شەهید محەمەد مەحمود شاهین لە ساڵی ١٩٥٠ لە گوندی گولیژگە سەر بەشارۆچکەی سیدەکان پارێزگای هەولێر لەدایک بووە، تا قۆناغی سەرەتایی خوێندوویەتی، خێزاندار بووە. ساڵی ١٩٦٤ پەیوەندی بە ڕێکخستنەکانى پارتی دیموکراتی کوردستان دەکات. ساڵى ١٩٦٦ لە بەتالیۆنى حاجى بێرۆخى سەر بە هێزى باڵەک بۆتە پێشمەرگە، لە شۆڕشی ئەیلوول بەشداری شەڕەکانی گەروی عۆمەرئاغا، بەرسرین، گۆشینە، چیایی پیرس، سپیلک، کەڵەکین، سەرتیز، گەروی بێشە، حەسەن بەگ، زۆزک و گۆڕەز کردووە.
ساڵی ١٩٧٥ دواى نسکۆى شۆڕشى ئەیلوول ئاوارەی وڵاتی ئێران بووە، لە ئوردۆگای جەهروم نیشتەجێ بووە، ساڵى ١٩٧٩ دەگوازرێتەوە بۆ ئۆردوگای زێوە. هەر لەو ساڵەدا پەیوەندی بە هێزى پێشمەرگەى شۆڕشی گوڵان دەکات، بەشداری شەڕەکانی سەردەشت، بەردەپان، قەندیل، حاجی ئۆمەران دەکات، ساڵی ١٩٨٨ لەداستانی خواکۆرک بەشداری دەکات و لەو شەڕەدا بەر چەکی کیمیاوی دەکەوێت.
ساڵى ١٩٩١ بەشدارى ڕاپەڕینى جەماوەرى باشوورى کوردستان دژى ڕژێمی بەعس دەکات و بەشدارى ئازادکردنى چۆمان، گەڵاڵە، سیدەکان، ڕەواندز دەبێت و بەشدارى شەڕەکانى کۆڕێ، هەولێر، قوشتەپە و بەحرکە کردووە، دواتر لە شەڕەکانی بەرگریکردن لە سەروەری یاسا لە سیدەکان، خنێرە، لۆڵان، خواکۆرک بەشداری کردووە، لەساڵی ١٩٩٨ لەبەر توانا و لێهاتووی، کراوەتە فەرماندەی بەتالیۆنی ١ی هێزی ٥ی سوپای ٧ی شەقڵاوە کە موسا گەردی فەرماندەی سوپا بووە و لەهەمان ساڵدا لە ڕۆژی ١٩ی حوزەیران، لەشەڕی بەرگریکردن لە سەروەری یاسا لە حاجی ئۆمەران لە چیای بەردەناز بەسەختی بریندار دەبێت، لە ڕۆژی ١٨ی تشرینی یەکەمی ١٩٩٨ لە میحوەری حاجی ئۆمەران لەشەڕی بەرگریکردن لە سەروەری یاسا بەدەستی چەکدارانی پەکەکە شەهید بووە.
سەرچاوە:
١-ئەرشیفى دەستەى ئینسکلۆپیدیاى پارتى دیموکراتى کوردستان.
