محەمەد عەبدولکەریم محەمەد ناسراو بە حەمە گرێزەیی، ساڵی ١٩٥١ لە گوندی گرێزەی سەربە قەزای سەیدسادق لە دایکبووە، گوندنشین بووە و سەرقاڵی کاری جوتیاری بووە، لە ساڵی ١٩٨١ لەگەڵ خۆی برایەکی بەناوی حەمەساڵح شەهید بووە، حەمە گرێزەیی لە دوای نسکۆی شۆڕشی ئەیلوول ئاوارەی وڵاتی ئێران بووە و لە نشینگەی دەربەندی دزڵی نیشتەجێ بووە، دوای گەڕانەوەیان بۆ کوردستان لەلایەن ڕژێمی بەعسەوە ڕاگواستی خوارووی عێراق کراون و لە شاری دیوانیە نیشتەجێ کراون، خێزاندار بووە و خێزانی ناوی گوڵچین فاروق بووە و خاوەنی سێ کوڕ و یەک كچ بووە بەناوەکانی سالار، سوارە، سۆران، چنور.
ساڵی ١٩٦٧ بۆتە پێشمەرگە لە لقی ٣ی بەتالیۆنی ٩ی شەهید دڵشاد کە سەربە هێزی خەباتی پارتی دیموکراتی کوردستان بووە، کە لەو کاتەدا شێخ محەمەد باساکی سەرلقی بووە و فەتاح ئاغا فەرماندەی بەتالیۆن بووە، لە ساڵی ١٩٦٩ پلەی سەرپەلی لە لقەکەی وەرگرتووە. ساڵی ١٩٧٤ لە شەڕی چیای سەرتیز بە سەختی برینداری بووە.
ساڵی ١٩٧٩ دووبارە پهیوهندی به هێزی پێشمهرگهی شۆڕشی گوڵان كردووهتهوه و لەلای عەبدوڵا ئاغا کە سەربە هێزی هەورامانی پارتی دیموکراتی کوردستان بووە بۆته پێشمهرگه.
لە ٤ی ئەیلوولی ١٩٨١ دوای ئەنجامدانی چالاکییەک لە دەشتی شارەزوور، ویستوویانە بچنە گوندی گرێزە بۆ پشوویەکی کورت و بردنی هەندێک پێویستی تایبەت بۆ شاخ، بەڵام پێش ئەوەی بگەنە گوندی گرێزە کەوتوونەتە بۆسەی هێزێكی یهكێتی و ڕووبەڕوویان بوونەتەوە لە ئەنجامدا حەمە گرێزەیی و حەمەساڵحی برای شەهید بوونە.
سەرچاوە:
ئەرشیفی دەستەی ئینسکلۆپیدیای پارتی دیموکراتی کوردستان
