ژیاننامە
فەرهاد عەلی ڕەزا عومەر لە ساڵی ١٩٤٦ لە گوندی ئاشۆکانی سەربە دەڤەری بەڕانەتی پارێزگای هەولێر لە دایکبووە. گوندنشین بووە و سەرقاڵی کاری جوتیاری بووە. لە خوێندن ئاستی سەرەتایی بووە. لە دوای نسکۆی شۆڕشی ئەیلوول تەواوی بنەماڵەکەی ئاوارەی وڵاتی ئێران بوونە و تا ساڵی ١٩٩١ دەرفەتی گەڕانەوەیان نەبووە و لە شارۆچکەی خانێ نیشتەجێ بوونە. شەهید فەرهاد عەلی خاوەنی پێنج برای شەهیدە بەناوەکانی شەهید ئەکرەم عەلی ڕەزا لە ساڵی ١٩٧٤، شەهید ئەسکەندەر عەلی ڕەزا لە ساڵی ١٩٨٣، شەهید تەڵعەت عەلی ڕەزا لە ساڵی ١٩٨٨، شەهید فەتاح عەلی ڕەزا لە ساڵی ١٩٨٨، شەهید ڕەزاق عەلی ڕەزا لە ساڵی ١٩٨٨. فەرهاد عەلی خێزاندار بووە و خێزانی ناوی سەهیرە ئەحمەد بووە و خاوەنی دوو کوڕ و دوو کچ بووە بەناوەکانی ڕۆستەم، مەحەمەد، توران و شیلان.
خەباتنامە
شەهید فەرهاد عەلی لە ساڵی ١٩٦٤ بۆتە پێشمەرگە لە پەلی عەلی ڕەزای باوکی لە حاجی ئۆمەران. ئەم پەلە لە ساڵی ١٩٦١ دامەزراوە و ڕاستەوخۆ پەیوەندیان لەگەڵ بارەگای بارزانی هەبووە و بارەگایان لە دەڤەری بارزان و حاجی ئۆمەران بووە.
فەرهاد عەلی لە ساڵی ١٩٦٩ لە حاجی ئومەران لە ڕووبەڕوو بوونەوەی سەربازی ڕژێمی ئەوکاتی عێراق فیشک بەر ڕانی ڕاستی کەوتووە و بە سەختی بریندار بووە.
لە ساڵی ١٩٧١ فەرهاد عەلی پلەی سەرپەلی وەرگرتووە و لە دەڤەری بارزان ئەرکی بینیووە.
لە دوای نسکۆی شۆڕشی ئەیلوول و ئاوارەیان لە وڵاتی ئێران، شەهید فەرهاد عەلی و بنەماڵەکەی چەکیان دانەناوە و بەردەوام بوونە لە خەباتی چەکداری خۆیان، دوای بەستنی کۆنگرەی نۆیەمی پارتی دیموکراتی کوردستان لە ساڵی ١٩٧٩ و دامەزرانی لقی دووی پارتی دیموکراتی کوردستان، پەلەکەی عەلی ڕەزا کە شەهید فەرهاد عەلی سەرپەلی بوو، کرانە مەفرەزەی پارتیزانی لقی دووی پارتی دیموکراتی کوردستان و شەهید فەرهاد عەلی کرا فەرماندەی ئەو مەفرەزەیە و لەسەر سنوری نێوان عێراق و ئێران ئەرکیان پێ سپێدرا.
شەهید فەرهاد عەلی لە ساڵی ١٩٨٠ بۆ دووەم جار لە دەڤەری خۆشناوەتی و لە دامێنی چیای سەفین لە ڕووبەڕوو بوونەوەی سەربازانی ڕژێمی بەعس فیشەک بەر شانی چەپی کەوتووە و بە سەختی بریندار بووە.
لە مانگی ٦ی ١٩٨٢ فەرهاد عەلی و دەستەیەک لە هاوسەنگەڕانی ویستوویانە بۆ ئەنجامدانی چالاکیەکی پارتیزانی بچنە دەشتی قەراج و کەندێناوە، بەڵام کە گەشتوونەتە نزیک گوندی قۆریتانی سەربە پارێزگای هەولێر، کەوتوونەتە بۆسەی سەرباز و جاشی ڕژێمی بەعس و ڕووبەڕوویان بوونەتەوە. دوای ڕووبەڕوو بوونەوەیەکی دوو کاتژمێری لە ئەنجامدا فەرهاد عەلی و بەشێک لە هاوسەنگەرانی بە برینداری دەستگیر کراون، گوازراونەوەتەوە بۆ شاری بەغداد و دادگای سەوڕەی بەغداد سزای لە سێدارەدانی سەربازی فیشەک باران بۆ فەرهاد عەلی و برایەکی بەناوی ئەسکەندەر عەلی ڕەزا و کوڕەخاڵێکی بەناوی ئیسماعیل عەوڵا حەمەد دەرکردووە.
لە ڕێکەوتی ١ی کانوونی دووەمی ١٩٨٣ بڕیاری لە سێدارەدانەکە جێبەجی کراووە و فەرهاد عەلی ڕەزا، ئەسکەندەر عەلی ڕەزا و ئیسماعیل عەوڵا حەمەد لەسێدارە دران.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
