ساڵى ١٩٧٥ دوای نسکۆی شۆڕشی ئەیلوول گەڕاوەتەوە بۆ گوندی ڕوست و لەوێ ماوەتەوە، دوای سەرهەڵدانی شۆڕشی گوڵان دووبارە گەڕاوەتەوە بۆ ناو ڕیزەکانی هێزى پێشمەرگە و لەگەڵ نەجمەدین گۆرۆنی و حەمید ئەفەندی لەمەفرەزە گەڕۆکەکان بووە، ساڵی ١٩٨٨ لەکاتی کیمابارانکردنی گوندی شێخ وەسان لەلایەن حکومەتی بەعسەوە فارس محەمەد ئەمین بەر چەکی کیمیاوی کەوتووە و بە برینداری گەڕاوەتەوە بۆ دۆڵی ڕوست.
لەڕاپەڕینی باشووری کوردستان لەساڵی ١٩٩١، لە چۆمان بووە و دواتر لە فەوجی یەکی باڵەک بۆتە پێشمەرگە کە براکەی فەرماندەی بووە، لەساڵی ١٩٩٥ برایەکی بەناوی قادر محەمەد ئەمین ناسراو بە قادرە سور لە شەڕی بەرگری لەسەروەری کوردستان لە گوندی گویزان شەهید بووە و دواتر فارس لە شوێنی ئەو دانراوە و کراوە بە فەرماندەی لیوا و پاشان گواستراوەتەوە بۆ سوپای باڵەک.
فارس محەمەد ئەمین حسێن قادر بەشداری چەندین شەڕی کردووە لەوانە شەڕی عەقوبان لەدەڤەری شەقڵاوە، کۆسی سپی و بەرسرین و جارێکیش قاچی ڕاستەی بریندار بووە، جگە لە براکەی، برازایەکی ناوبراو شەهید بووە، لە ٢٨ی ئایاری ٢٠١٣ بەهۆی ئەو خزمەتانەی پێشکەشی کورد و کوردستان و ڕێبازی بارزانی کردووە، لەلایەن سەرۆک مەسعود بارزانی مەدالیای بارزانی پێ بەخشرا.
سەرچاوە:
١-ئەرشیفى دەستەى ئینسکلۆپیدیاى پارتى دیموکراتى کوردستان.
