خەمەد میـــرحەمەد فەتـــاح، ناسراو بە (خەمەد بارزانى)، ساڵى ١٩٤٩ لە ناحیەى گۆڕەتووى سەر بە قەزاى مێرگەسۆر پارێزگاى هەولێر لەدایک بووە، خێزاندارە، ساڵى ١٩٧٩ ئاوارەى وڵاتى ئێران بووە، ساڵى ١٩٩١ دواى راپەڕینى جەماوەرى باشوورى کوردستان گەڕاوەتەوە و لە قەزاى سۆران نیشتەجێ بووە.
ساڵى ١٩٧٢ پەیوەندى بەهێزى پێشمەرگەى شۆڕشی ئەیلوول کردووە و سەرەتا بەشێوەى هێزى بەرگرى میللى لەگەڵ حەسۆ میرخان ژاژۆکى بووەتە پێشمەرگە، ساڵى ١٩٧٤ گوازراوەتە بۆ هێزى کاوەى لەشکرى کوردستان، ساڵى ١٩٧٥ دواى نسکۆى شۆڕشی ئەیلوول ئاوارە نەبووە، لە گۆڕەتوو ماوەتەوە، ساڵى ١٩٧٧ لەلایەن هەواڵگرى ڕژێمى عێراق دەستگیرکراوە و بۆ ماوەى دوو ساڵ و چوار مانگ لە زیندانەکانى هەولێر و کەرکووک و ئەبوغرێب زیندانى کراوە، پاش ئەوە بەر لێبوردنى گشتى کەلەلایەن سەرۆکى ڕژێمى عێراق دەرکراوە، ئازاد کراوە.
ساڵى ١٩٧٩ دواى ئازادبوونى لە زیندان پەیوەندى بە هێزى پێشمەرگەى شۆڕشی گوڵان کردووەتەوە و لە هێزى بارزان بە فەرماندەیی دکتۆر سەعید ئەحمەد نادر، لە گەلى ڕەش لە دەڤەرى حەیات لەسەر سنوورى باکوورى کوردستان بووەتەوە پێشمەرگە.
حەمەد میـــرحەمەد فەتـــاح، لەژیانى پێشمەرگایەتى بەشدارى چەندین شەڕ و چالاکى پارتیزانى کردووە، وەک شەڕى مێرگەسۆر ساڵى ١٩٧٨، شەڕ و داستانى خواکوڕک لە دەڤەرى برادۆست ساڵى ١٩٨٨، شەڕى کۆڕێ ساڵى ١٩٩١. چەندین جار لە شەڕەکان دژى سوپاى عێراق بریندار بووە، لەوانە شەڕى مێرۆز، شەڕى شنۆ، شەڕى مێرگەسۆر، شەڕەکانى خواکوڕک و کۆڕێ. ساڵى ١٩٩٢ دواى پێکهێنانى لەشکرى یەکگرتووى کوردستان پەیوەندى بە هێزى پێشمەرگە کردووە و چەندین پلەى سەربازى بڕیووە، ئێستاش لە فەرماندەیی بارزان بە پلەى لیوا درێژە بەئەرکە سەربازییەکانى دەدات (٢٠٢٥).
لە ١٥ی کانوونى یەکەمى ٢٠١٠ لە کۆنگرى ١٣ى پارتی دیموکراتی کوردستان، بەهۆی خزمەتەکانى لەلایەن سەرۆک مەسعود بارزانی میدالیای بارزانی پێ بەخشراوە.
سەرچاوە:
١- ئەرشیفی دەستەی ئینسکلۆپیدیای پارتی دیموکراتی کوردستان.
