ژیاننامە
تەلعەت عەلی ڕەزا عومەر لە ساڵی ١٩٤٥ لە گوندی ئاشۆکانی سەر بە دەڤەری بەڕانەتی پارێزگای هەولێر لە دایکبووە، گوندنشین بووە و سەرقاڵی کاری جوتیاری بووە، لە دوای نسکۆی شۆڕشی ئەیلوول تەواوی بنەماڵەکەی ئاوارەی وڵاتی ئێران بوونە و تا ساڵی ١٩٩١ دەرفەتی گەڕانەوەیان نەبووە و لە شاری نەغەدە نیشتەجێ بووە، شەهید تەلعەت عەلی خاوەنی پێنج برای شەهیدە بەناوەکانی شەهید ئەکرەم عەلی ڕەزا لە ساڵی ١٩٧٤، شەهید ئەسکەندەر عەلی ڕەزا لە ساڵی ١٩٨٣، شەهید فەرهاد عەلی ڕەزا لە ساڵی ١٩٨٣، شەهید فەتاح عەلی ڕەزا لە ساڵی ١٩٨٨ و شەهید ڕەزاق عەلی ڕەزا لە ساڵی ١٩٨٨. تەلعەت عەلی خێزاندار بووە و خێزانی ناوی زولێخا عەوڵا حەمەد بووە و خاوەنی سێ کوڕ و دوو کچ بووە بەناوەکانی ئیدریس، موخلیس، محەمەد، ئەدیبە و نەسیبە.
خەباتنامە
شەهید تەلعەت عەلی لە ساڵی ١٩٦٤ بۆتە پێشمەرگە لە پەلی عەلی ڕەزای باوکی لە حاجی ئۆمەران، ئەم پەلە لە ساڵی ١٩٦١ دامەزراوە و ڕاستەوخۆ پەیوەندیان لەگەڵ بارەگای بارزانی هەبووە و بارەگایان لە دەڤەری بارزان و حاجی ئۆمەران بووە.
لە دوای نسکۆی شۆڕشی ئەیلوول و ئاوارەیان لە وڵاتی ئێران، شەهید تەلعەت عەلی و بنەماڵەکەی چەکیان دانەناوە و بەردەوام بوونە لە خەباتی چەکداری خۆیان، دوای بەستنی کۆنگرەی نۆیەمی پارتی دیموکراتی کوردستان لە ساڵی ١٩٧٩ و دامەزراندنی لقی دووی پارتی دیموکراتی کوردستان، هێزەکەی عەلی ڕەزا کە شەهید فەرهاد عەلی سەرپەلی بوو، کرانە مەفرەزەی پارتیزانی لقی دووی پارتی دیموکراتی کوردستان و شەهید تەلعەت عەلی تێیدا بەردەوامی بە خەباتی خۆی داوە.
لە ڕێکەوتی ١٦ی ئایاری ١٩٨٨ شەهید تەلعەت عەلی و شەش هاوسەنگەری بەناوەکانی شەهید فەتاح عەلی ڕەزا، شەهید ڕەزاق عەلی ڕەزا، شەهید محەمەد ڕەن و شەهید خەلیل دەچنە سەر ڕێگەی کاروانێکی سەربازی ڕژێمی بەعس کە بۆ ئەنفالکردنی چەند گوندێک ڕوویان لەو دەڤەرە کردووە، دوابەدوای یەک کاتژمێر لە ڕووبەڕووبوونەوەی هێزەکەی بەعس و ڕێگری لێیان، لە ئەنجامدا هەر حەوت پێشمەرگەکە بێ سەروشوێن بوونە و هیچ سۆراغێکیان نیە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
