بەهجەت ئەحمەد عەبدوڵا ئەحمەد لە ساڵی ١٩٥٣ لە گوندی بەرەکە لە دایک بووە. لە ساڵی ١٩٦٥ پەیوەندی بە ڕێکخستنەکانى پارتی دیموکراتی کوردستان دەکا و لە ساڵی ١٩٦٩ دەبێتە پێشمەرگەی هێزی بێتواتە. دواى نسکۆى شۆڕشی ئەیلوول ئاوارەى وڵاتى ئێران بووە، لە ساڵی ١٩٨٠ پلەی سەرپەلی پێدەبەخشرێت. لە حەوتی ئەیلوولی ١٩٨٠ لە روبەڕووبوونەوە لەگەڵ دوژمن، لە گوندی مەلەکان بە برینداری دەکەوێتە دەست دوژمن و جەستەی بە نێزە پارچە پارچە دەکرێت.
ژیاننامە
بەهجەت ئەحمەد عەبدوڵا ئەحمەد لە ساڵی ١٩٥٣ لە گوندی بەرەکە لە دایک بووە. ئاستی خوێندەواری سەرەتایی بووە. پیشەکار بووە و ژنى نەهێناوە، دایکى ناوى حەلیمە حسن احمد بووە و هەریەک لە شەهاب ئەحمەد، خەتاب ئەحمەد، نەجات ئەحمەد براى ئەون.
خەباتنامە
بەهجەت ئەحمەد لە ساڵی ١٩٦٥ لە ڕێگەی رێکخراوی هەریر پەیوەندی لەگەڵ ڕێکخستنەکانی پارتی دیموکراتی کوردستان دروست دەکات، لە ساڵی ١٩٦٩ دەچێتە هێزی بێتواتە و دەبێتە پێشمەرگە، تا ساڵی ١٩٧٥ و نسکۆى شۆڕش لە پێشمەرگایەتى بەردەوام دەبێ و دواتر ئاوارەی وڵاتی ئێران دەبێت و لەوێ پەیوەندیى لەگەڵ ڕێکخستنەکانى هێزى پێشمەرگەى کوردستان دەمێنێ.
لە ساڵی ١٩٨٠ لەگەل پێشمەرگەکانی ناوچەی شەقڵاوە دەگەڕێنەوە کوردستان کە ئەوکات فەرماندە ئەحمەد زەخۆک بەرپرسیان بووە، لەو ساڵەدا کاروچالاکی باشیان دەبێت و ناوبراو پلەی سەرپەلی لە پێشمەرگایەتى پێدەدرێ.
لە ڕێکەوتى حەوتی ئەیلوولی ١٩٨٠ لە گوندی مەلەکان توشی روبەڕووبونەوەیەکی سەخت دەبن لەگەڵ دوژمنان، دوای شەڕێکی قوڕس بە برینداری دەکەوێتە دەست دوژمن هەر ئەوکات دوژمن بە زیندوویی جەستەی پارچە پارچە دەکەن و شەهید دەبێت.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
