ژیاننامە 

شەهید هاشم عەزیز ئەحمەد ناسراو بە هاشم مێرۆزی، لە ساڵی 1925 لە گوندی مێرۆز لە ناوچەی موزوری باڵە سەر بە قەزای مێرگەسۆر سەر بە پارێزگای هەولێر لە دایکبووە. دووجار هاوسەرگیری کردووە، هاوسەرەکانی بەسنا خەلیل و فەیرۆز بوون، خاوەنی ٦ کوڕ و ٤ کچە، دوو کەسیان شەهید بوون بە ناوی حسێن هاشم عەزیز مێرۆزی لە ساڵی ١٩٩٦ و سدیق هاشم مێرۆزی لە ساڵی ١٩٨٦ شەهید بووە.

بیرەوەری خەبات 

لەساڵی 1945 پەیوەندی بە ڕیزەکانی شۆڕشی دووەمی بارزانەوە کردووە و بووە بە پێشمەرگە، یەکێک لە پێشمەرگە چاونەترس و بوێرەکانی شۆڕشی بارزان، بەهۆی دڵسۆزی و زانستی لە تەمەنی گەنجیدا کەسێکی دیار بووە لە خێڵی مەزوری، نوێنەری شێخ ئەحمەد بارزانی بووە لە خێڵی ئۆف مەزوری، لە ساڵی 1961دا بوو بە پێشمەرگە لە شۆڕشی ئەیلولدا لە هەمان ساڵدا بوو بە جێگری عیسا سوار سێلکی فەرماندەی هێزی زاخۆ.

وەک فەرماندە بەشداری زۆر شەڕی کردووە و سەرپەرشتی هێزی پێشمەرگەی کردووە، لەوانە شەڕەکانی چەمی زاخۆ، باتیفە، گەلی سپی، عەین زالە، مەتینا، گەرە، زاویتە، ئەتروش، و چەمی قەیمەت، دووجار بە سەختی بریندار بووە. بەهۆی ئەزموون و ئازایەتییەکەیەوە پۆستی فەرماندەی هێزی شێخان لەلایەن بارزانی ئەفسانەییەوە وەردەگرێت.

لە 10ی ئایاری ساڵی 1965 لە شەڕی شاخی ئەتروشدا بە سەختی بریندار دەبێت و دوای چەند کاتژمێرێک بەهۆی سەختی برینەکەیەوە شەهید دەبێت و لە گوندی حەسنکە لە ناوچەی مەزووری چیای ئەتروش بەخاک سپێردرا، یەکێک بوو لەو شەهیدانەی کە گۆڕەکەی نەناسرابوو، بەڵام دوای 45 ساڵ لە شەهیدبوونی گۆڕەکەی دۆزرایەوە.

سەرچاوە:

ئەرشیفی ئینسایکلۆپیدیای Kdp