شەهید قادر عەبدولکەریم ئەڵماس ناسراو بە قەڵا مەینجان پێشمەرگەی شۆڕشی ئەیلول و یەکێک بوو لە یەکەم پێشمەرگەکانی فیرقەی هەورامان. لە ساڵی 1963 لە عەین وازنیە لە دەڤەری هەورامان، دوای ئەوەی سەنگەرە بەرگرییەکانی پێشمەرگە تووشی تۆپباران کران، شەهید بوو.

شەهید قادر عەبدولکەریم ئەڵماس ناسراو بە قەڵا مەینجان، لە ساڵی 1913 لە گوندی نوسوی ڕۆژهەڵاتی کوردستان لەدایکبووە، لە تەمەنی لاوێتیدا ڕوویکردووەتە ناوچەی هەورامان و لە گوندی بەڵخا نیشتەجێ دەبێت کە سەر بە ناحیەی بیارەیە لە پارێزگای هەڵەبجە، لەوێ لە پیشەی جۆراوجۆردا کاری کردووە. هاوسەرگیری لەگەڵ قەتان موراد کردووە، سێ کوڕ و دوو کچیان بووە. کوڕەکەی بە ناوی ڕەزا قادر لە ساڵی ١٩٦٩ لە سەردەمی شۆڕشی ئەیلولدا شەهید بوو و هەردوو کچەکەی بە ناوەکانی سەعدە و توبە لە ئەنجامی کیمیابارانی شاری هەڵەبجە شەهید بوون.

لە ساڵی ١٩٦١ پەیوەندی بە ڕیزەکانی پێشمەرگەی فیرقەی هەورامانەوە کردووە. یەکێک بوو لە یەکەم پێشمەرگەکانی فیرقەی هەورامان لە شۆڕشی ئەیلولدا، بەو پێیەی فیرقەی هەورامان بوو بە یەکەم فیرقەی چەکداری لە ناوچەکەدا کە پەیوەندی بە شۆڕشەوە کرد و سەر بە فەوجەکەی خەباتی پارتی دیموکراتی کوردستان بوو.

لە ساڵی 1963 قادر عەبدولکەریم و دوو هەڤاڵ پێشمەرگەی (قەڵا سور و غەفور ئەحمەد) لەکاتی تۆپبارانکردنی سەنگەرەکانیان لەلایەن سوپای عێراقەوە برینداربوون، بەڵام قادر عەبدولکەریم بەهۆی سەختی برینەکەیەوە گیانی لەدەستدا.

سەرچاوە:

ئەرشیفی دەسەڵاتی ئینسایکلۆپیدیای پارتی دیموکراتی کوردستان