شەهید غەفور محەمەد ساڵح ناسراو بە (غەفور گەلە چالی) پێشمەرگەی شۆڕشی گوڵان بوو. ساڵی 1983 لەگەڵ دوو پێشمەرگەی هاوڕێی لە ناوچەی تاگوزی لەلایەن میلیشیاکانی ڕژێمی بەعسەوە کەوتنە بۆسە. غەفور گەلە چالی بە برینداری لەلایەن سەرکردەی میلیشیاکانەوە دەگیرێت و بە دەستی خۆی کوشتوویەتی و سەری بڕیوە و دواتر سەری بە ڕژێمی بەعس فرۆشتووە بە باجێک.

شەهید غەفور محەمەد ساڵح ناسراو بە (غەفور گەلە چالی)، لە ساڵی 1955 لە گوندی گەلە چالی کە سەر بە ناحیەی بەمۆیە لە پارێزگای هەڵەبجە لەدایک بووە، بازرگان بووە لە بازاڕەکانی قەزای زەڕاین و یەکێک بووە لە دانیشتووانی قەزای زەڕاین.

ساڵی 1982 پەیوەندی بە هێزەکانی سیروانی پارتی دیموکراتی کوردستانەوە کردووە، کە جەلال لاورانی سەرۆکایەتی دەکات. ڕۆژی 3ی ئایاری ساڵی 1983 لەگەڵ دوو لە هەڤاڵانی پێشمەرگەی (سلێمان عەبدولڕەحمان تاگوزی و فایق عەلی غەفوور) کەوتنە بۆسەی میلیشیاکانی لایەنگری بەعسی قەلخانی لە نزیک گوندی هۆکان لە ناوچەی تاگوزی هەڵەبجە. دوای پێکدادان لە نێوان هەردوولا، فایق عەلی کوژرا، غەفور محمد (غەفور گەلە چالی)ش بریندار بوو، دوای ئەوەی تەقەی لە قاچی کرد و لەلایەن میلیشیاکانەوە دەستگیرکرا. پاشان سەرکردەی میلیشیاکە سەری بڕی و سەری بۆ خێزانەکەی نارد و سەری بە ڕژێمی بەعسی فرۆشت. هەروەها هەڤاڵ بریندارەکەی سلێمان ڕادەستی سەربازانی ڕژێمی بەعس کرا و دوای تێپەڕاندنی ساڵێک و سێ مانگ لە زیندان کۆچی دوایی کرد.

سەرچاوە:

ئەرشیفی دەسەڵاتی ئینسایکلۆپیدیای پارتی دیموکراتی کوردستان