شەهید عەزیم عەبدولکەریم محمد ناسراو بە (عەزیمی دەروێش) پێشمەرگەی جۆلان و ڕاپەڕینی جەماوەری خەڵکی کوردستان بوو. جارێک لە کاتی خەباتی لە ڕیزەکانی پێشمەرگەدا بریندار بوو. لە ساڵی 1991 دوای کەوتنە بۆسەیەک کە لەلایەن هێزەکانی موجاهدینی خاڵقەوە لە نزیک قەزای خانەقین دانرابوو، شەهید بوو. یەکێکە لەو شەهیدانەی کە گۆڕەکانی نادیارە.

شەهید عەزیم عەبدولکەریم محمد ناسراو بە (عەزیمی دەروێش)، لە ساڵی 1949 لە گوندی زەرین لە ناوچەی تاگوزی سەر بە پارێزگای هەڵەبجە لەدایک بووە، گوندنشین بووە و لە بواری کشتوکاڵدا کاری کردووە، هەروەها هاوسەرگیری لەگەڵ کەتان محمد عەلی کردوە، کوڕێکیان (کۆسار) بووە.

لە ساڵی 1979 لە فەوجەکەی تاگۆزین بە سەرۆکایەتی قادر حەمەساڵح تاگۆزەیی پەیوەندی بە هێزی پێشمەرگەوە کردووە. بەشداری زۆر شەڕی کردووە، لەوانە: شەڕی زۆزاک، شەڕی خواکورک، شەڕی هەڵەبجە، شەڕی زامناکۆ، شەڕی قەرداغ، ئۆپەراسیۆنی شەڕ لە دەشتی شارەزوور. لە ساڵی 1981 لە کاتی ئەنجامدانی ئۆپەراسیۆنی شەڕ لە دەشتی شارەزوور گولەی لە قاچی ڕاستی کەوتووە و بە سەختی بریندار بووە.

شەهید عەزیم عەبدولکەریم لە ساڵی 1991 بەشداری لە ڕاپەڕینی جەماوەری خەڵکی کوردستان و لە ئازادکردنی شارەکانی هەڵەبجە، سەیدسادق، عەربەت، زەراین، دەربەندیخان، سلێمانی، کەرکوک، کەلار، و باونور کرد.

ساڵی 1991 خۆی و ژمارەیەک لە هەڤاڵانی پێشمەرگەی لە نزیک گوندی شێخ باوێ لە قەزای خانەقین کەوتنە بۆسەی هێزەکانی موجاهیدینی گەل. لەم ڕووداوەدا هەموویان شەهید بوون. ئاماژە بەوەشکراوە، لە نێو ئەو شەهیدانەدایە کە گۆڕەکانیان نادیارە.

سەرچاوە:

ئەرشیفی دەسەڵاتی ئینسایکلۆپیدیای پارتی دیموکراتی کوردستان