ئەحمەد مەولود مەحمود ناسراو بە ئەحمەد مینا، لە ساڵی 1932 لە گوندی بەلخە کە سەر بە ناحیەی بەیارەیە لە دەڤەری هەورامان لەدایک بووە، گوندنشین بووە و کاری باخداری کردووە. هاوسەرگیری لەگەڵ کافیا یەمام کردووە، سێ کوڕ و سێ کچیان هەبووە (وشیار، وەکیل، سەردار، مەهتاب، سوعاد، شانە).
ساڵی 1961 پەیوەندی بە پێشمەرگەی فراکسیۆنی هەورامانەوە کردووە بە فەرماندەیی شێخ حەمەئەمین کە سەر بە فەوجەکەی خەباتی پارتی دیموکراتی کوردستان بووە. لە ساڵی ١٩٦٥ لە کاتی ڕووبەڕووبوونەوەی سوپای ڕژێمی عێراق لەو کاتەدا لە ناوچەی بیلولە لە دامێنی چیای بەمۆ بە سەختی بریندار بوو. لە ساڵی 1967 لە ناحیەی بیارە سەر بە دەڤەری هەورامان بەرپرسیارێتی زیندانی شۆڕشی لە ئەستۆ گرتووە، زیندانێک کە لەلایەن هێزەکانی خەباتەوە سەرپەرشتی دەکرا.
ئەحمەد مەولود و دوو لە هەڤاڵانی پێشمەرگەی (مەلا قادر و عەلی حەلاو) لە ساڵی 1969 لە گوندی حەمە ئۆغان، لە نێوان ناوچەی نەورۆڵی و شاری هەڵەبجە، کەوتنە بۆسەی سوپای ڕژێمی عێراق، دوای دوو کاتژمێر شەڕ و پێکدادان لەگەڵ ئەو هێزانە هەموویان شەهید بوون.
سەرچاوە:
ئەرشیفی دەسەڵاتی ئینسایکلۆپیدیای پارتی دیموکراتی کوردستان
