شەهید کەمال عەلی، لە ساڵی ١٩٤٧ لە ناحیەی خورماڵی سەربە پارێزگای هەڵەبجە لە دایکبووە، دانیشتووی خورماڵ بووە و سەرقاڵی کاری جوتیاری و کەسابەتی ناو بازاڕی خورماڵ بووە، تا قۆناغى سەرەتایی خوێندووە.
شەهید کەمال عەلی لە ساڵی ١٩٦٧ پەیوەندی بە ڕیزەکانی پێشمەرگەی شۆڕشى ئەیلوول کردووە و لە لقی پێنج بە سەرپەرشتی حسێن بەگی جوانڕۆیی سەربە بەتالیۆنی حەوتی بیارە بە فەرماندەیی جەمال نامیق سەربە هێزی خەباتی پارتی دیموکراتی کوردستان بووەتە پێشمەرگە.
لەگەڵ بڵاوبوونەوەی هەواڵی بوون بە پێشمەرگەیی کەمال عەلی، باوکی کەمال لەلایەن سەرۆک جاشێکەوە بەناوی ڕەشەی ساڵح دەستگیر کراوە و دواتریش دەست بەسەر تەواوی زەوی کشتوکاڵی و یەکەی نیشتەجێ بوونیاندا دەگرێت و بنەماڵەکەی لە ناحیەی خورماڵ وەدەرنراوە.
کەمال عەلی بەشداری شەڕی جاشە کۆڵوانە سورەکان لە ناحیەی خورماڵ ساڵی ١٩٦٨، شەڕی عەربەت ساڵی ١٩٦٨، شەڕی کۆڵوانە سورەکان لە چیای شنروێ ساڵی ١٩٦٩، شەڕی جاشە کۆڵوانە سورەکان لە عەبابەیلێی نزیک پارێزگای هەڵەبجە ساڵی ١٩٦٩ کردووە.
جەلالیە کۆڵوانە سورەکان بوونەتە پێشڕەو و ڕێنیشاندەری سوپاى ئەوکاتی عێراق بۆ سەر سەنگەرەکانی بەرگری هێزی پێشمەرگە، لە ساڵی ١٩٦٩ هێرشیان کردۆتە سەر سەنگەری عەبابەیلێ و کەمال عەلی بە فیشەکی کۆڵوانە سورەکان شەهید بووە.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
