شەهید کاوە عەبدوڵا شاکر، ساڵی ١٩٦٣ لە گەڕەکی بەفری قەندیلی قەزای کۆیەی سەربە پارێزگای هەولێر لە دایکبووە، دانیشتووی شاری کۆیە و دەرچووی قۆناغی ئامادەیی بەشی زانستی بووە، کوڕە شەهید بووە.
شەهید کاوە عەبدوڵا، ساڵی ١٩٨٠ لە قۆناغی ئامادەیی لە شاری کۆیە، پەیوەندى بەڕێکخستنە نهێنییەکانى پارتى دیموکراتى کوردستان کردووە و لە شانەی نهێنی ئاگری سەربە لێژنەی ناوچەی کۆیەی سەربە لقی دوو بۆتە کادر. لەو ماوەیەدا لەگەڵ خوشکێکی بە ناوی مامۆستا پەیمان کە هەردووک کادری هەمان شانە بوونە، ڕۆڵێکی باشیان بینیوە لە کۆکردنەوەی زانیاری لەسەر سەربازی ڕژێمی بەعس و ئەو چالاکییانەی کە دژ بە پارتی دیموکراتی کوردستان دەکرا.
ساڵی ١٩٨٤ لە ئەنجامى ئاشکرابوونی شاری کۆیەی بەجێهێشتووە و ڕووی کردۆتە وڵاتی ئێران و لە هێزی کۆیەى سەر بە بەشی سەربازی لێژنەی ناوچەی کۆیەی لقی دووی پارتی دیموکراتی کوردستان بۆتە پێشمەرگە، بارەگایان لەناو خاکی ئێران بووە و سەنگەری بەرگریان لە سەر سنووری نێوان عێراق ئێران بووە.
لە مانگی ئاداری ١٩٨٥ هێزێکی زۆری سەرباز و جاشی ڕژێمی بەعس هێرشیان کردۆتە سەر سەنگەرەکانی بەرگری هێزی پێشمەرگە لە چوار دەوری حاجی ئۆمەران، هەر لە ئەنجامی ئەو هێرشەدا کاوە عەبدوڵا شەهید بووە و تەرمی کەوتۆتە دەست جاشەکانی ڕژێمی بەعس و تەرمەکەیان بردووە و یەکێکە لەو شەهیدانەی کە گۆڕی نادیارە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
