ئەسەد وسیەن غەفور، ساڵی ١٩٧٢ لە شاری هەڵەبجە لە دایکبووە، تا پۆلی چوارەمی قۆناغی ئامادەیی خوێندووە، ساڵی ١٩٨٩ لەلایەن ئەمنی گشتی بەعس لە شاری سلێمانی دەستگیر کراوە و ماوەی یەک ساڵ و چوار مانگ زیندانی بووە و فەرمانی لە سێدارەدانی بۆ دەرچووە، بەڵام بەهۆی ڕاپەڕینی شیعەکانی شاری نەجەف و کەربەلا، ساڵی ١٩٩١ لە زیندان خۆی دەرباز کردووە.
ساڵی ١٩٨٣ چۆتە گوندی ئەحمەدئاوا بۆ بوون بە پێشمەرگە، بەڵام بەهۆی بچوکی تەمەنی لەلایەن فەرماندەکانی هێزی پێشمەرگەوە وەرنەگیراوە، ساڵی ١٩٨٣ دوای گەڕانەوەی لە شاخ ڕاستەوخۆ پەیوەندی بە شانە نهێنیەکانی پارتی دیموکراتی کوردستانەوە کردووە، بۆتە کادر لە شانەی هەورامان عوسمان کە بەرپرسی ڕێکخراو بووە سەربە لێژنە ناوچەی هەڵەبجەی لقی چواری پارتی دیموکراتی کوردستان، کادرێکی ڕۆشنبیر و چالاک بووە و سەرپەرشتی کۆمەڵێک چالاکی کردووە.
لە تشرینی یەکەمی ١٩٨٩ ئەسەد وسیەن غەفور چۆتە گوندی باینجانی نزیک شاری سلێمانی بۆ ئەنجامدانی کۆبوونەوە لەگەڵ شانە نهێنیەکانی ئەو دەڤەرە، بەڵام یەکێک لە بەشداربووانی کۆبوونەوەکە خۆفرۆش بووە و کات و شوێنی کۆبوونەوەکەی ئاشکرا کردووە، بەم هۆیەوە ئەسەد لەناو گوندەکە لەلایەن سەرباز و کادری هەواڵگری ڕژێمی بەعسەوە گەماڕۆ دراوە و دەستگیر کراوە، گوازراوەتەوە گرتووخانەی گەورەی شاری سلێمانی و دوای نۆ مانگ زیندانی نێردراوە بۆ مەنزومەی شیمالی کەرکووک، هەر لەوێ بڕیاری لە سێدارەدانی بۆ دەرچووە، بۆ جێبەجێکردنی بڕیارەکەی دادگای سەورەی عێراقی ئەسەد گوازراوەتەوە گرتووخانەی نەجەف، بەڵام بەهۆی ڕاپەڕینی خەڵکی شاری نەجەف و تێکچوونی باری ئەمنی شارەکە، ئەسەد وسیەن غەفور دەرفەتێک دەدۆزێتەوە و لە زیندان خۆی دەرباز کردووە. پێشمەرگەی ڕاپەڕینە جەماوەرییەکەی خەڵکی کوردستان بووە.
لە ٧ی ئاداری ١٩٩١ لە گرتنەوەی بنکەی پۆلیسی باینجان فیشەک بەر قاچی کەوتووە و بریندار بووە، دوای وەرگرتنی چارەسەری پێویست بڕیاری داوە کە پشوو نەدات و بەشدار بێت لە شاڵاوی ڕاپەڕین.
لە ٨ی ئاداری ١٩٩١ لە ئازادکردنی شاری سلێمانی، لە ئەمنە سورەکەی شاری سلێمانی کەوتووتە بۆسەی سەربازی ڕژێمی بەعس و سەرەتا بە نارنجۆکی دەستی لە بەردەم دەرگای ئەمنەسورەکە بە سەختی بریندار بووە، دوای هەستانەوەیی و بەردەوامی لە هێرش بردن بۆناو ئەمنەسورەکە، لەناو دەرگای بارەگاکە لە چەند لایەکەوە دەستڕێژی فیشەکی لێکراوە و شەهید بووە، بەهۆی زۆری به‌ركه‌وتنی فیشەک تەواوی جەستەی شێواوە.
سەرچاوە:
ئەرشیفی دەستەی ئینسکلۆپیدیای پارتی دیموکراتی کوردستان
