ژیاننامە
شەهید ئەحمەد ڕەحمان ئەبوبەکر، ساڵی ١٩٣٣ لە گوندی هەورامانی تەخت لە ڕۆژهەڵاتی کوردستان لە دایکبووە، بەهۆی بژێوی ژیانەوە ڕووی کردۆتە هەرێمی کوردستان و لە گوندی زەڵمی سەر بە ناحیەی خورماڵ نیشتەجێ بووە و کاری ئاژەڵداری کردووە. شەهید ئەحمەد ڕەحمان خێزاندار بووە و خێزانی ناوی بەدریە ڕەحمان محەمەد بووە، ساڵی ١٩٧٨ شەهید بووە.
خەباتنامە
شەهید ئەحمەد ڕەحمان ئەبوبەکر، ساڵی ١٩٦٨ پەیوەندی بە هێزی پێشمەرگەی سەر بە بەتالیۆنی حەوتی بیارە بە فەرماندەیی نادر هەورامی سەربە هێزی خەباتی پارتی دیموکراتی کوردستان کردووە، شەهید ئەحمەد ڕەحمان هەر زوو بۆتە جێی متمانەی فەرماندەی بەتالیۆن و گوازراوەتەوە بارەگای بەتالیۆن و وەک پاسەوانی تایبەتی فەرماندەی بەتالیۆن ئەرکی بینیوە.
ساڵی ١٩٧٥ له‌دوای نسکۆی شۆڕشی ئەیلوول شەهید ئەحمەد ڕەحمان لە خزمەتی پێشمەرگایەتی دانەبڕاوە و هەروەک پاسەوانی نادر هەورامی لەگەڵ فەرماندەکەی ئاوارەی وڵاتی ئێران و له سەر سنووری نێوان هەردوو وڵات بووە.
ساڵی ١٩٧٨ هێزە سەربازییەکانی ڕژێمی ئەوکاتی عێراق هێرشێکی فراوانیان کردۆتە سەر سەنگەرەکانی پێشمەرگە لەسەر سنوور و دەڤەری هەورامان، ئەحمەد ڕەحمان ئەبوبەکر لە سەنگەری بەرگریدا لە هانە گەرمەڵە لەپشت ناحیەی بیارە، شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
