ئیسماعیل ئەحمەد مەناف حەبیب، ساڵى ١٩٤٣ لە گوندى سەزەبڵاغ لە ناحیەى قورەتووى قەزاى خانەقینى پارێزگاى دیالە لەدایک بووە، خێزاندار بووە، ساڵى ١٩٧٥ دواى نسکۆى شۆڕشی ئەیلوول ئاوارەى وڵاتى ئێران بووە، لە ئۆردوگاکانى ئەزەل و زەهاو نیشتەجێ بووە، دواتر لەلایەن ساواک بۆ شارى ئابادان دوور خراوەتەوە. ساڵى ١٩٩١ گەڕاوەتەوە باشوورى کوردستان.
ساڵى ١٩٥٨ پەیوەندى بە ڕیزەکانى یەکیەتى قوتابیانى کوردستان کردووە، ساڵى ١٩٦٢ پەیوەندى بە هێزى پێشمەرگەى شۆڕشی ئەیلوول کردووە و لە بەتالیۆنى ٦ى بەمۆى هێزى ڕزگارى بووەتە پێشمەرگە. ساڵى ١٩٦٧ کراوەتە سەرپەل و بەرپرسی سەربازى. ساڵى (١٩٦٢-١٩٧٥) بەشدارى چەندین شەڕى دژى سوپاى عێراق کردووە، لەوانە شەڕى حاجى ئۆمەران و شەڕەکانى چیای زۆزک و خانەقین و شەڕى بەمۆ.
ساڵى ١٩٧٧ گەڕاوەتەوە شارەدێی ڕەوانسەر و پەیوەندى بە هێزى پێشمەرگەى شۆڕشی گوڵان کردووەتەوە. ساڵى ١٩٨٠ پلەى کارگێڕی لێژنە ناوچەى خانەقینى وەرگرتووە و بەرپرسی سەربازى لێژنە ناوچەى ناوبراو بووە، بەشدارى چەندین مەفرەزەی پارتیزانى کردووە، ساڵى ١٩٨٨ بەشدارى شەڕى خواکوڕکى کردووە.
ساڵى ١٩٩١ وەک کارگێڕ و بەرپرسی بەشى سەربازى لێژنە ناوچەى کەلار بەشدارى ڕاپەڕینى جەماوەرى باشوورى کوردستانى کردووە. ساڵى ١٩٩٢ دواى پێکهێنانى هێزى پێشمەرگەى هاوبەش بە پلەى موقەدەم کراوەتە فەرماندەى لیواى دووى کەلار و تا ساڵى ١٩٩٤ لەو ئەرکەى بەردەوام بووە.
ساڵى ١٩٩٤ کراوە بە ئەندامى میحوەرى نەوڕۆڵى لە هەڵەبجەى شەهید و دواتریش ئەرکى لێپرسراوى هەواڵگرى لیواى ٤٥ى گەرمیانى وەرگرتووە. ساڵى ١٩٩٦ لە سوپاى گەرمیان کراوەتە بەرپرسی ئیداری سوپا. ساڵى ٢٠٠٢ بۆتە ئەندامى سوپاى حەمرین و تا ساڵى ٢٠٠٥ لەو ئەرکەى بەردەوام بووە.
ساڵى ٢٠٠٥ گوازراوەتەوە بۆ فەرماندەیی گەرمیان و بە پلەى عەقید کراوەتە بەرپرسی عەمەلیاتى فەرماندەیی گەرمیان و تا ساڵى ٢٠١٠ لەو ئەرکەى بەردەوام بووە و لەهەمان ساڵ تووشى جەڵتەى مێشک بووە، بۆیە ساڵى ٢٠١٢ خانەنشین کراوە.
لە ١٣ى تشرینى یەکەمى ١٩٩٩ لە کۆنگرەى ١٢یەمى پارتى دیموکراتى کوردستان، بە هۆى ئەو خزمەتانەى کە پێشکێشى کردوون، لەلایەن سەرۆک مەسعود بارزانى میدالیاى بارزانى پێ بەخشراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
