ژیاننامە
ئیبراهیم ئەحمەد موراد شاوەیس، ساڵی ١٩٥٧ لە گوندی تەکیەی سەر بە ناحیەی خورماڵ لە دایکبووە، گوندنشین بووە و بۆ خوێندنی قۆناغەکانی سەرەتایی و ناوەندی ڕووی کردۆتە ناحیەی خورماڵ و دەرچووی قۆناغی ناوەندی بووە، باوکی ئیبراهیم پێشمەرگەی شۆڕشی ئەیلوول بووە و دوای نسکۆی شۆڕش تەواوی بنەماڵەکەی ئاوارەی وڵاتی ئێران بوونە و لە شاری شیراز نیشتەجێ بوونە، خێزاندار بووە و خێزانی ناوی فاتیمە عەلی ساڵح بووە و خاوەنی یەک کوڕ و یەک کچ بووە بەناوەکانی ئیسماعیل و هاجەر، ساڵی ١٩٨٦ شەهید بووە.
خەباتنامە
شەهید ئیبراهیم ئەحمەد موراد، ساڵی ١٩٧٩ پەیوەندی بە ڕێکخستنەکانی ڕێکخراوەی خورماڵی سەر بە لیژنە ناوچەی هەڵەبجەی لقی چواری پارتی دیموکراتی کوردستان کردووە، ساڵی ١٩٨٠ پلەی بەرپرسی شانەی شەهید مستەفای ناو ناحیەی خورماڵی وەرگرتووە.ساڵی ١٩٨١ بۆتە پێشمەرگەی لقی چواری عومەر غەمگین سەر بە بەتالیۆنی شنروێی هێزی سورێنی پارتی دیموکراتی کوردستان.
شەهید ئیبراهیم ئەحمەد موراد شاوەیس لە یەک کاتدا هەم ئەرکی پێشمەرگایەتی هەم ئەرکی کادری ڕێکخستنەکانی پارتی دیموکراتی کوردستان بەجێ گەیاندووە، لە ڕێکخستنی دیدار و چاوپێکەوتنی نێوان کادرانی شانەی نهێنی ناو شار و فەرماندەکانی شاخ ڕۆڵی باڵای هەبووە. توانیویەتی چەند تۆڕێکی هەواڵی بۆ دەستخستنی زانیاری لەسەر جوڵە و پلانی سوپای ڕژێمی بەعس دروست بکات.
لە شەوی ٢٧ لەسەر ٢٨ی شوباتی١٩٨٦ئیبراهیم ئەحمەد موراد و دوو فەرماندەی بەتالیۆنی هێزی سورێن و دوو پێشمەرگەی تر گەڕاونەتەوە بۆ ناو ناحیەی خورماڵ بۆ ئەنجامدانی کۆبوونەوەی ڕێکخستن لەگەڵ ستافی ڕێکخراوی خورماڵ، بەڵام لە مەجموعەی خورماڵ کەوتوونەتە بۆسەی جاشی ڕژێمی بەعس و لە ئەنجامدا ئیبراهیم ئەحمەد و هاوسەنگەرێکی بەناوی ساڵح تەحسین شەهید بوونە و عومەر غەمگین فەرماندەی بەتالیۆنی سێی هێزی سورێن بەسەختی بریندار بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
