شەهید محەمەد حاجی لە ساڵی ١٩٦٧ لە ناحیەی هەڵشۆی سەربە قەزای پشدەر پارێزگاى سلێمانى لە دایکبووە، سەرقاڵی کاری جوتیاری گوند بووە و تا قۆناغی سەرەتایی خوێندووە، خێزاندار بووە و خاوەنی یەک کوڕ و یەك کچ بووە.
ساڵى ١٩٨٣ پەیوەندى بە هێزى پێشمەرگەى شۆڕشى گوڵان کردووە، لە هێزەکەی خاڵە سەید کاکە، کە ئەو کات بارەگای هێزەکەیان لە دۆڵی بالیسان بووە بۆتە پێشمەرگە. بەشداری لە چەند چالاکییەکی پارتیزانی کردووە، لەوانە چالاکیەک لە ناو شاری هەولێر، چالاکیەک لە قەزای کۆیە. هەروەها لە شەڕەکانی دۆڵی بالیسان، شەڕەکانی دەشتی کۆیە، شەڕەکانی چیای سەفین و سماقوڵی بەشدارى کردووە. لە شۆڕشی گوڵاندا سێ جار بریندار بووە، لەوانە ساڵى ١٩٨٥ لە شەڕی سماقوڵی بەرامبەر سەربازی ڕژێمی بەعس، ساڵى ١٩٨٧چالاکی پارتیزانی لە شەقامی سوڵتان مزەفەر لە شاری هەولێر، ساڵى ١٩٨٩ چالاکی پارتیزانی بنکەی پۆلیسی قەزای کۆیە.
ساڵی ١٩٩١ بەشدارى ڕاپەڕینى جەماوەرى کوردستانى کردووە، لە ئازادکردنی شەقڵاوە، کۆڕی، شاوەیس، هەولێر، پردێ، کەرکووک بەشدار بووە.
لە ٢١ی ئازارى ١٩٩١ لە ئازادکردنی شاری کەرکووک و لەناو گۆڕەپانی سەربازگەی خالید فیشەکی بەرکەوتووە و شەهید بووە و تەرمەکەى هەر لەو گۆڕەپانەدا بەجێ ماوە و یەکێکە لەو شەهیدانەی کە گۆڕی نادیارە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
