عەشقی ئاراب لەگەڵ ڕاگەیاندنی شۆڕشی ئەیلوول لە ١١ی ئەیلوولی ١٩٦١ بۆتە پێشمەرگە لەلای حارس بێدارونی و لەگەڵ بارزانی نەمر بووە لەچیای پیرس، و ساڵی ١٩٦٢ لەگەڵ بارزانی نەمر دەپەڕێتەوە بۆ ناوچەی سۆران و باڵەک، عەشقی ئاراب لەگەڵ هێزەکەی خۆی و بەفەرماندەیی حارس بێدارونی چۆتە ناوچەی باڵەک و پشدەر، لەکاتی هێرشکردنە سەر قشڵەی ڕایات لەلایەن هێزی پێشمەرگەوە، ناوبراو لە چیای هەڵگورد هێزی پشتیوان بووە بۆ ڕێگەگرتن لەهاتنی سوپای عێراق و جاش بۆ شکاندنی گەمارۆی هێزی پێشمەرگە بۆ سەر قشڵەی ڕایات، لەهەمان ساڵدا گەڕاوەتەوە بۆ سرێشمە و لەوێوە بۆ چیای برادۆست و بۆ بارزان، لە ساڵی ١٩٦٣ بەشداری کردووە لە شەڕەکانی بەرگریکردن لەو هێرشانەی کەکرایە سەر ئەو ناوچەیە و لەئەنجامدا دوژمن ناچاربووە پاشەکشێ بکات، لەهەمان ساڵدا لەگەڵ هێزەکەی حارس بێدارونی و بارزانی گەڕاوەتەوە بۆ ناوچەی سۆران و تاکو ساڵی ١٩٦٥ لە سەنگەسەر بووە، لەهەمان ساڵدا گواستراوەتەوە بۆ مەکتەبی سیاسی و ئەرکی پاسەوانی بەشی پاراستنی شۆڕشی پێ سپێردراوە کە مەسعود بارزانی بەرپرسی بووە، تاکو ساڵی ١٩٧٤ لەو ئەرکە بەردەوام بووە و دواتر کراوە بە فەرماندەی بەتالێونی یەک.
پاش نسکۆی شۆڕشی ئەیلوول لەساڵی ١٩٧٥ سەرەتا لەکۆمەڵگای ڕەبەت لەناوچەی سەردەشت بووە و دواتر چۆتە نەغەدە و بۆتە پاسەوانی ماڵی بارزانی نەمر، لەساڵی ١٩٧٩ پەیوەندی بە شۆڕشی گوڵانەوە دەکات لە هێزی بارزان و گەڕاوەتەوە بۆ زێوە و لەگەڵ دکتۆر سەعید ئەحمەد نادر چووەتە بێدار و کەتینە و لەوێ بارەگای هێزیان داناوە و بە مەفرەزەی گەڕۆک زەبریان لە پێگەکانی ڕژێم وەشاندووە، دواتر لە ساڵی ١٩٨٨ بارەگایان گواستۆتەوە بۆ حەیات و گەلی ڕەش، دوای شاڵاوی بەدناوی ئەنفال و کیمیابارانکردنی ناوچەی بادینان گەڕاوەتەوە بۆ ڕۆژهەڵاتی کوردستان، لە ژیانی پێشمەرگایەتی بەشداری دەیان شەڕی کردووە و لەشەڕەکانی چیای بەرزێوە لەدەڤەری باڵەک لەساڵی ١٩٦٤ و چیای پیران لەساڵی ١٩٨٤ و چیای وەرتێ و دڕەبی و شەڕی ڕەواندز لەساڵی ١٩٩٥بریندار بووە، باوک و برایەکی لەشەڕی چیای بێدارون لەساڵی ١٩٣٧شەهیدبوون، برایەکی دیکەی لەساڵی ١٩٨٨ لە پشت گوندی کەکلە لەدەڤەری مێرگەسور شەهید بووە، لەکۆنگرەی ١٣ی ساڵی ٢٠١٠ لەلایەن سەرۆک مەسعود بارزانی میدالیای بارزانی نەمری پێ بەخشراوە، ئێستا بەپلەی عەقید لە ڕیزەکانی لەشکەری پێشمەرگەی کوردستان لە بارزان درێژە بەخەباتی خۆی دەدات.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
