عومەر ڕەحیم ئەحمەد، ساڵی ١٩٤٥ لە گوندی پیرداودی سەربە ناحیەی شەمامکی قەزای قوشتەپەی پارێزگاى هەولێر لە دایکبووە، گوندنشین و سەرقاڵی کاری جوتیاری بووە، تا قۆناغى سەرەتایی خوێندووە، خێزاندار و خاوەنی یەک کوڕ بووە.
عومەر ڕەحیم ئەحمەد، ساڵی ١٩٧٠ پەیوەندى بە هێزى پێشمەرگەى شۆڕشی ئەیلوول کردووە و لە هێزی ئازادی سەربە لقی دووی پارتی دیموکراتی کوردستان، بەفەرماندەیی خورشید شێرە بۆتە پێشمەرگە. ساڵی ١٩٧٤ بەشداری داستانی بێستانە، شەڕی دەشتی کۆیە، شەڕی چیای سەفین و داستانی کێلە شین کردووە و لە شەڕی کێلە شین گولەى بەرکەتووە و بە سەختی بریندار بووە. دوای وەرگرتنی چارەسەر بۆ پشوویەکی کورتی چەند ڕۆژە ساڵی ١٩٧٤ کە هاوکات بووە لەگەڵ ٢٨ تەمین ڕۆژی مانگی ڕەمەزان، گەڕاوەتەوە ناو گوندی پیرداود بۆ لای خانەوادەکەی، لەلایەن چەند خۆفرۆشێکەوە زانیاری لەسەر دەدرێت، هەر بۆیە لە ڕۆژى دواتر، هێزێکی زۆر چواردەوری ماڵەکەی دەدەن، ڕووبەڕووی هێزەکە بۆتەوە و توانیویەتی حەوت سەرباز بکوژێت و ١٢ سەربازیش بریندار بکات، بۆیە هێزی سوپاى عێراق کشاونەتەوە و لە دەروازەی گوند بە چەکی دۆشکەی سەر تانک گولەبارانیان کردووە و سێ گولەى دۆشکەی بەر سەری کەوتووە و شەهید بووە. تەرمەکەى کەوتۆتە دەست سەربازانى سوپاى عێراق و بردوویانەتە ناو شاری هەولێر و شێواندوویانە. لەلایەن چەند کەسایەتیەکی شاری هەولێرەوە تەرمەکەى بە شێواوی وەرگیراوەتەوە و بەخاک سپێردراوە. ئەم نەبەردییەی عومەر ڕەحیم ئەحمەد بۆتە جێی باس لە ناو شاری هەولێر و چواردەوری هەربۆیە لەلایەن نووسەران و هونەرمەندانەوە چەند بەرهەمێکی هونەری لەسەر ئەنجامدراوە بەناوی داستانی پیرداود.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
