شەهید عوسمان حەسەن مستەفا، ساڵی ١٩٥٠ لە گوندی ئاریانەی سەربە ناحیەی شۆڕشی قەزای کۆیەی پارێزگاى هەولێر لە دایکبووە، گوندنشین بووە و سەرقاڵی کاری ئاژەڵداری بووە، عوسمان حەسەن خێزاندار و خاوەنی یەک کوڕ بووە.
شەهید عوسمان حەسەن، ساڵى ١٩٦٩ پەیوەندی بەهێزى پێشمەرگەى شۆڕشی ئەیلوول کردووە و لە لقی عەریف ئەبو زێد کە سەربە بەتالیۆنی دووی هێزی دەشتی هەولێری پارتی دیموکراتی کوردستان، بە فەرماندەیی عەریف عوسمان بۆتە پێشمەرگە. بەشداری لە شەڕەکانی چیای سەفین، شەڕەکانی دەشتی هەولێر، شەڕەکانی دەشتی کۆیە، شەڕی چیای کۆڕەک، شەڕی ڕواندز، بەنی هەریر، شەڕی بەرسیرین، شەڕی حاجی ئۆمەران کردووە.
ساڵی ١٩٧٤ دوای تێکشکاندنی هێرشی سەربازی ئەوکاتی عێراق بۆ سەنگەری بەرگری پێشمەرگە لە گوندی بندایزانی قەزاى چۆمان لە دەڤەری باڵەکایەتی، فڕۆکەی ڕژێمی ئەوکاتی عێراق بە چڕی بۆمبارانی سەنگەرەکانی هێزی پێشمەرگەی کردووە و لە ئەنجامدا عوسمان حەسەن شەهید بووە و لەلایەن هاوسەنگەرانیەوە لە گۆڕستانی گوندی بندایزان بە خاکیان سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
