ژیاننامە
شەهیدێ فەرماندە عەلی هالۆ عەلی محەمەد یێ بەرنیاس عه‌لى هالۆ ،ل سالا ١٩٢٠ێ ل گوندێ بوسەلێ سەرب ناوچەيا دەرکارێ دەڤەرا سنديا سەرب دەڤەردارييا زاخۆ هاتیه دنیایێ، دژيێ حەفت ساليێ دا عەلى هالۆ خواندنا قورئانا پيروز ل مزگەفتا گوندێ خو ب دوماهيک ئينايه.
خەباتنامە
هەر ل دەستپێکا پەيدابوونا رێکخستنێن پارتی دیموكراتی كوردستان ل دەڤەرا زاخۆ عه‌لى هالۆ پەيوەنديێ ب رێکخستنێن حزبى ڤە دکەت و دبيته ئەندامەکێ کارا ل دەڤەرێ، پشتی ڤه‌گه‌ریانا بارزانیێ نه‌مر ل ئێكه‌تیا سوڤیه‌ت ل رێزا سوپایێ عێراقێ تێتە دەر ب پلا ميلازمێ ئێکێ، ل سالا ١٩٥٨ دەمێ ڤە گەريانا بارزانی ل ئێكه‌تیا سوڤیه‌تا پێشوو عه‌لى هالۆ ب سەروکاتيا شاندەکی دچنە بەغدا بو پێشوازيا جەنابێ نەمر مستەفا بارزانی، ل سالا ١٩٦١ دەستپێکا شۆڕشا ئەیلوولا مەزن عه‌لى هالۆ دگەل هژمارەکا پێشمەرگێن قارەمان ل کەس و کارێن خو خەلکێ دەڤەرێ پەيوەنديێ ب رێزێت شۆڕەشێ ڤە دکەت و دبيتە پێشمەرگە ودەورەکێ مەزن دگێريت و د زوربەيى داستاناندا پشکداريێ دکەت . هەر ل سالا ١٩٦١ عەلى هالۆ ئێک ژ وان فەرماندەيا بويه کو بەشداری د رزگارکرنا باژێرێ زاخۆدا کريه، هەر هينگێ ژی دبيتە ئەندامێ جڤاتا نافخويا شوڕەشێ، ل پايیزا سالا ١٩٦١ دەمێ بارزانی دچيتە دەڤەرا بادينان عه‌لى هالۆ دگەل پێشمەرگە و هەڤسەنگەرێن خو دچيتە پێشوازيا جەنابێ بارزانی، دەمێ بارزانی عه‌لى هالۆ دبينت کو کەسەکێ ژێهاتی و خاندەڤان و مێرخاسە پلەيا سەرقولێ شوڕەشێ پێ دهێتە بەخشين.
سالا ١٩٦٢ عه‌لى هالۆ دبيته فەرماندێ بەتەليونا ئێک ل هێزا زاخو، دەورەکێ بلند دگێريت دگەل پێشمەرگێن خوە دا چەندين داستانێن مەزن تومار دکەن ژ وان داستانا گەليێ زاخو، داستانا عەين زاله، داستانا باتيفا، داستانا چيايێ سپی، داستانا کەمەکا و مانگێشکێ، داستانا مەغفەرا بێشابيرێ و چەندين داستانێن دی، سالا ١٩٦٣ عەلى هالۆ ئێک ژ وان فەرماندەيا بوويه كو پشکداری د داستانا چيايێ مەتينی دا کری و سەرکەفتنەکا مەزن د بەرژەوەنديا شوڕەشێدا تومارکری، دژيێ خويێ شوڕەشگێريێ دا عەلى هالۆ ل زاخۆ تا دەشتا هەولێر و سلێمانيێ ژی رولەکێ بەرچاڤ دگێريت و دوو جاران ژی ب گرانی بريندار دبيت، سالا ١٩٦٤ حکومەتا وی دەمی هەولا تيرورکرنا عه‌لى هالۆ ددەن د رێکا بوريا سوپێ دارا نارنجوکەکێ دهاڤێنە مالا وی دا د ئەنجامدا هەڤژينا وى و کورەکێ وی کو ژيێ وی ١٠ سال بوون شەهيد بن وعه‌لى هالۆ ژى ب سەختی بريندار دبيت و چاڤەکێ خو ژدەست ددەت و زاروکێن وی ژی بريندار دبن.
ل سالا ١٩٦٦ ژبەر شارەزايی و لێهاتيا وى د بوارێن سەربازی و کارگێری و کومەڵايەتی عه‌لى هالۆ دبيته ئەندامێ سەرکردايەتيا شورەشێ، ل ٢٣ێ ئەیلوولا ١٩٦٨ ل سەررێکا دناڤبەرا باتيفا و زاخۆ د کريارەکا نەديارا هاتنو چونێدا عه‌لى هالۆ گيانێ خو ژ دەست ددەت و شەهيد دبيت.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
