عه‌بدول سوران حه‌سه‌ن عه‌بدولڕە‌حمان ئاغا،ناسراو به عه‌بدول قه‌ره‌نی، سیاسه‌تمه‌دار، ساڵی ١٩٥٢ پهیوهندی به پارتی دیموكراتی كورده‌وه كردووه، ساڵی ١٩٦١ پهیوهندی به ڕیزه‌كانی هێزی پێشمه‌رگه‌وه كردووه، ساڵی ١٩٦٤ كراوه‌ته كارگێڕی لێژنه‌ی لقی چواری پارتی دیموكراتی كوردستان و پشتگری جه‌نه‌راڵ مستەفا بارزانی و دژی كۆنفرانسی ماوه‌تی مه‌كته‌بی سیاسی بووه، ساڵی ١٩٧٠ له‌لایه‌ن نوێنه‌رانی كۆنگره‌ی هه‌شته‌‌‌م به ئه‌ندامی كۆمیته‌ی ناوه‌ندی پارتی دیموكراتی كوردستان هه‌ڵبژێردراوه.
ژیاننامه
عه‌بدول سوران حه‌سه‌ن عه‌بدولڕە‌حمان ئاغا، له پارێزگای سلێمانی دایك بووه، له بنه‌ماڵه‌ی قه‌ره‌نی ئاغای موكرییه، به ڕه‌چه‌ڵه‌ك باپیرانی له موكریانه‌وه هاتوونه‌ته شاری سلێمانی، ساڵی ١٩٥٤ قۆناغی ئاماده‌یی ته‌واو كردووه، ساڵی ١٩٥٤ ئه‌ندامی لێژنه‌ی نواندنی قوتابخانه‌ی دواناوه‌ندی سلیمانی بووه بۆ نمایشی شانۆگه‌ری بروسكه و شیرین له نووسینی ئه‌مینی میرزا كه‌ریم و جه‌نابی موفه‌تیش له نووسینی گۆگۆڵ بووه، ساڵی ١٩٥٥ به ناوی سه‌ربازییه‌وه بۆ شوعه‌یبه له باشووری عێراق دوور خراوه‌ته‌وه و وه‌ك ده‌ستبه‌سه‌ر مامه‌ڵه‌یان له‌گه‌ڵدا كردووه، ساڵی ١٩٥٦ له‌به‌ر چالاكی سیاسی له‌لایه‌ن ده‌سه‌ڵاتدارانی پاشایه‌تی عێراقه‌وه بۆ شاره‌دێی به‌دره له پارێزگای كوت دوور خراوه‌ته‌وه، ساڵی ١٩٥٧ له ناوه‌ندی به‌ڕێوه‌به‌رایه‌تی لێكۆڵێنه‌وه‌ی تاوان (مدیریة التحقیقات جنائي) له شاری به‌غدا به توندی ئه‌شكه‌نجه دراوه..
خه‌باتنامه
عه‌بدول سوران حه‌سه‌ن عه‌بدولڕە‌حمان ئاغا، ساڵی ١٩٥٢ پهیوهندی به پارتی دیموكراتی كورده‌وه كردووه، ساڵی ١٩٦١ پهیوهندی به ڕیزه‌كانی هێزی پێشمه‌رگه‌وه كردووه، ساڵی ١٩٦٤ كراوه‌ته كارگێڕی لێژنه‌ی لقی چواری پارتی دیموكراتی كوردستان، له مانگی نیسانی ساڵی ١٩٦٤ له‌گه‌ڵ كۆمه‌ڵێك كادیر و فه‌رمانده له گوندی سه‌نگه‌سه‌ر چاویان به سه‌رۆك مستەفا بارزانی (١٩٠٣ـ ١٩٧٩) كه‌وتووه و دژ به بڕیاره‌كانی كۆبوونه‌وه فراوا‌نه‌كه‌ی ماوه‌ت لایه‌نگیری و پشتگیری خۆیان بۆ سه‌رۆك ده‌ربڕیوه و هه‌ڵوێستی ناڕه‌زایه‌تییان له دژی مه‌كته‌بی سیاسی ده‌ربڕیوه، له سه‌ره‌تای مانگی حوزه‌یرانی ١٩٦٤دا به ئه‌ندامی لێژنه‌ی ئاماده‌كاری كۆنگره‌ی شه‌شه‌‌می پارتی دیموكراتی كوردستان هه‌ڵبژێردراوه، له ناوه‌ڕاستی ساڵی ١٩٦٦دا له‌لایه‌ن كۆمیته‌ی ناوه‌ندی پارتی دیموكراتی كوردستانه‌وه به ئه‌ندامی لێژنه‌ی ئاماده‌كاری كۆنگره‌ی حه‌وته‌‌‌م ده‌ستنیشان كراوه، ساڵی ١٩٧٠ له‌لایه‌ن نوێنه‌رانی كۆنگره‌ی هه‌شته‌‌‌م به ئه‌ندامی كۆمیته‌ی ناوه‌ندی پارتی دیموكراتی كوردستان هه‌ڵبژێردراوه، ساڵی ١٩٧١ كراوه‌ته‌وه كارگێڕی لێژنه‌ی لقی چوار، ساڵانی (١٩٧٠ـ ١٩٧٤) به‌ڕێوه‌به‌ری شاره‌وانی شاری سلێمانی بووه، له ١٩ی حوزه‌یرانی ١٩٧٢ له (ڕۆژی شه‌هید)دا به نوێنه‌رایه‌تی سه‌ركردایه‌تی پارتی دیموكراتی كوردستان به‌شداری مه‌راسیمی چوار ئه‌فسه‌ری شه‌هید و سه‌ركرده‌ی پارتی له گۆڕستانی گردی سه‌یوان له شاری سلێمانی كردووه، ساڵی ١٩٧٤ بۆ جاری دووه‌م پهیوهندی به ڕیزه‌كانی هێزی پێشمه‌رگه‌وه كردووه، ساڵی ١٩٧٥ له دوای نسكۆی شۆڕشی ئەیلوول وه‌ك په‌نابه‌ر ڕووی كردووه‌ته شانشینی ئێران به‌ڵام زوو گه‌ڕاوه‌ته‌وه باشووری كوردستان و بۆ شاری سه‌ماوه له پارێزگاری ئه‌لموسه‌نا له باشووری عێراق دوور خراوه‌ته‌وه، له ١٩ی ئه‌یلوولی ١٩٨١دا له شاری سلێمانی تیرۆر كرا و له گۆڕستانی گردی سه‌یوانی شاری سلێمانی ئه‌سپێرده‌ی خاك كراوه، شاره‌زای زمانه‌كانی كوردی و عه‌ره‌بی بووه.
سه‌رچاوه‌كان :
١.مه‌لا به‌ختیار، له‌بری بیره‌وه‌ری، (تاران ـ ناوه‌ندی ڕۆشنگه‌ریی چاودێر ـ ٢٠٢٠ز)، ل ٢٢.
٢.ئاماده‌كردنی : سه‌ڵاح ڕەشید، مام جه‌لال دیداری ته‌مه‌ن له لاوێتیه‌وه بۆ كۆشكی كۆماری، به‌رگی یه‌كه‌م، (سلێمانی ـ چاپخانه‌ی كارۆ ـ ٢٠١٧ز)، ل ٨٤.
٣.یاسین قادر به‌رزنجی، شانۆگه‌رییه‌كانی سلێمانی له ساڵانی ١٩٢٦ ـ ١٩٦١دا، (سلێمانی ـ ده‌زگای چاپ و په‌خشی سه‌رده‌م ـ ٢٠٠١ز)، ل ل ٥٧ ـ ٥٩.
٤.شكیب عقراوي، صدام حسین نهوضا ونكوسا، (أربیل ـ مطبعة حاجي هاشم ـ ٢٠٠٩م)، ص ٣٨١.
٥.پارتی سۆشیالیستی كورد (پاسۆك)، هێزی شاره‌زووری پێشمه‌رگه‌ی پاسۆك، ئه‌نتله‌جێنس سیرڤس چ تاوانێ له كوردستاندا ده‌گێڕێ، كۆتایی تشرینی یه‌كه‌می ١٩٨١ز، ل ل ١ ـ ٢.
٦.تاڵیب مۆریاسی، گه‌ڕان به‌دوای راستیدا، به‌رگی یه‌كه‌م، (هه‌ولێر ـ ٢٠٠٤ز)، ل ل ١٣٨، ١٤٨، ١٥٣.
٧.خلیل عبدالعزیز، محطات من حیاتي، (بغداد ـ دار سطور للنشر والتوزیع ـ ٢٠١٨م)، ص ٢٩.
٨.هه‌ڤاڵ كوێستانی، ئه‌و ڕۆژانه‌ی نیشتمان هی هه‌مووان بوو، (سلێمانی ـ چاپخانه‌ی كارۆ ـ ٢٠١٧ز)، ل ل ٣٠٢ ـ ٣٠٣.
