دیاره شۆڕشی كورد به پێی قۆناغ و هه‌لومه‌رجی ڕۆژگار به بارودۆخی تایبه‌تدا تێپه‌ڕیوه، ئه‌و سه‌رده‌مه‌ی كه خواست و ویستی شۆڕش پێویستی به شەڕی به‌ره‌ی هه‌بووبێ و شار و ناوچه‌كان ئازاد ده‌كران و هێزی پێشمه‌رگه لێی ده‌مایه‌وه و ئاماده‌كاری ڕووبه‌ڕووبوونه‌وه‌ی بۆ ده‌كرد، به‌ڵام له دوای هه‌ڵگیرسانی شۆڕشی گوڵان هه‌لومه‌رجی دۆخه‌كه وای ده‌خواست كه زۆربه‌ی جار هێزی پێشمه‌رگه به شێوازی شەڕی پارتیزانی به‌ره‌نگاری ده‌زگا و دامه‌زراوه سه‌ربازی و ئاسایشه‌كانی ڕژێمی به‌عس ده‌بووەوە، په‌یامی شۆڕش و گرنگیه‌كه‌ی به‌و جۆره به سه‌رانی حكومه‌ت ده‌گه‌یاند، لێره‌دا گرنگه ڕۆڵی ڕێكخستنی ناوشاره‌كان پشتگوێ نه‌خرێ و هه‌میشه له‌به‌ر چاو بگیرێ كه هانده‌ر و ڕێنوێنی چاڵاك بوون بۆ شۆڕش، تاكو كادره‌كانی ڕێكخستن و هێزی پێشمه‌رگه بتوانن به ئه‌ركی شۆڕشگەڕایەتى خۆیان ڕابن، ته‌نانه‌ت بتوانن چاڵاكییه پێشمه‌رگه‌ییه‌كانیان ئه‌نجام بده‌ن، هه‌ڵبه‌ته به‌ڕێوه‌چوونی زۆرێك له چاڵاكییه‌كان له ناو شاره‌كان و قوڵایی ده‌سه‌ڵاتی حكومه‌ت له‌م هه‌ڵوێسته‌ی ڕێكخستنی نهێنی ناوشاره‌كانی شۆڕش به‌ده‌ر نه‌بووه([1]).
هێزی پێشمه‌رگه‌ی كوردستان به فه‌رمانده‌یی ملازم بابه‌كر و هۆشیار زێباری هه‌ستان به ئه‌نجامدانی چاڵاكییه‌كی پێشمه‌رگانه له سه‌نته‌ری شاری ئاكرێ، دوای ئه‌وه‌ی كه‌وا هێزی پێشمه‌رگه‌ی هاوبه‌شی نێوان پارتی دیموكراتی كوردستان و حزبی شیوعی عێراق ساڵى ١٩٨٣ پلانی لێدانی بنكه و باره‌گاكانی حزبی به‌عسیان له ناو شاری ئاكرێ داڕشت، به‌پێی پلان و نه‌خشه‌ی هێرشه‌كه شوێنه‌كان به‌سه‌ریان دابه‌شكران و له كات و شوێنی دیاركراو هه‌ڵیانكوتایه سه‌ر بنكه و داموده‌زگاكانی به‌عس له شاره‌كه، توانیان له ماوه‌یه‌كی كه‌م زیانێكی گه‌وره به داموده‌زگاكانی به‌عس بگه‌یه‌نن.
له‌و داستانه هه‌ریه‌ك له پێشمه‌رگه‌كه‌كان عەبدوڵا قادۆ ، سلێمان هه‌رنی، بیلال سورچی، عه‌بدولعه‌زیز ئامێدی، سادق گوێزی، ئه‌حمه‌د شاهین، ڕه‌زا، شیمال زێباری و شیخ ئه‌حمه‌د سورچی به‌شدار بوون، كه ڕۆڵێكی كاریگه‌ریان گێڕا له شه‌ڕه‌كه‌دا.
ئه‌نجامی شه‌ڕه‌‌كه به زیانێكی گه‌وره له داموده‌زگاكانی به‌عس کۆتایی هات و ده‌نگدانه‌وه‌یه‌كی زۆری به دوای خۆیدا هێنا له ناوچه‌كه، له‌لایه‌ن هێزی شۆڕشیش شه‌هیدبوونی پێشمه‌رگه‌یه‌ك به ناوی شێخ ئه‌حمه‌د سورچی و برینداربوونی دوو پێشمه‌رگه‌ی تر به ناوه‌كانی جاسم زێباری و ئه‌حمه‌د به‌هاركی لێکەوتەوە ([2]).
سه‌رچاوه:
- مه‌سعود بارزانی، بارزانی و بزوتنه‌وه‌ی ڕزگاریخوازی كورد، به‌رگی چواره‌م، ١٩٧٥-١٩٩٠ شۆڕشی گوڵان، به‌شی دووه‌م، چاپی یه‌كه‌م، چاپخانه‌ی ڕوكسانا، ٢٠٢١.
- غازی عادل گه‌ردی، پێشمه‌رگه‌یه‌ك له خزمه‌ت بارزانیدا... حه‌جی بێڕۆخ، به‌رگی دووه‌م چاپی دووه‌م، توركیا- ٢٠٢١.
[1] - غازی عادل گه‌ردی، پێشمه‌رگه‌یه‌ك له خزمه‌ت بارزانیدا... حه‌جی بێڕۆخ، به‌رگی دووه‌م چاپی دووه‌م، توركیا- 2021، ل46.
[2] - مه‌سعود بارزانی، بارزانی و بزوتنه‌وه‌ی ڕزگاریخوازی كورد، به‌رگی چواره‌م، 1975-1990 شۆڕشی گوڵان، به‌شی دووه‌م، چاپی یه‌كه‌م، چاپخانه‌ی ڕوكسانا، 2021، ل61.
