بەردەوامى چالاکییەکانى پێشمەرگە بە شێوەیەکى بەربڵاو سنوورى شەڕ و پێکدانى نێوان هێزى پێشمەرگە و سوپا و هێزە چەکدارییە عێراقیەکانى بە جۆرێک فراوانکردبوو کە زۆربەى ناوچە جیاجیاکانى گرتبووە، هەڵبەتە هێزى پێشمەرگە بۆ داکۆکیکردن لە مافى میللەت هەمیشە بە دواى ئەو دەرفەتە گەڕاوە کە لە هەر سوچێک بۆیان بلوێ گورزى کوشندە لە هێزە سەربازیەکانى حکومەت بوەشێنن و پەیامى ناڕەزایى و هەڵویست وەرگرتن لە هەمبەر پێشێلى مافى کورد بە ڕای گشتى بگەیەنن، لە چالاکی ئەو جارەى هێزى پێشمەرگەدا کە لە شەوى ١٠ لەسەر١١ى کانوونى دووەمى ١٩٨٨ ڕوویدا هێرشێک بوو بۆ سەر فەوجى تایبەتى ٦ لە مەندیل دوورى ٥ کم لە شارى چەمچەمال، دواى ئەوەى کەوا بەرپرسانى هێزى پێشمەرگە ڕاوێژ و ڕاگۆڕینەوەیان کرد دەربارەى ئەنجامدانى چالاکییەک بە مەبەستى وەشاندنى گورزێک بە هێزەکانى حکومەت، پلانى هێرشەکەیان داڕشت پاشان هەڵیان کوتایە سەر بارەگاى فەوجەکە.
هێرشی پێشمهرگه بۆ سهر هێزە سهربازیهكانی حکومەتى عێراق بە بەشدارى پێشمەرگەکانى لێژنەى ناوچەکانى چەمچەماڵ، شوان، بازیان، کەلار، ڕێکخراوى ڕەنجدەران و هێزێکى بارەگاى لقى ٣ی پارتی دیموکراتی کوردستان بوو، دیارە لەو ماوەیەدا هێزى پێشمەرگە لە چوارچێوەى ئۆرگانى ڕێکخستنى حزبیدا ڕێکخرابوو وەک لق و ناوچە و ڕێکخراو، دواى ئەوەى کە نەخشە و پلان بۆ ئەنجامدانى چالاکى پێشمەرگانە لەو سنوورەدا داڕێژرا، دواى تەواوبوونى ئامادەکاریەکان و دانانى کاتى دەستپێکردن، هێرش بۆ سەر ئەو فەوجەی سوپای عێراق دەستى پێکرد، لەگەڵ یەکەم هەڵمەتى پێشمەرگەدا هێندەى نەخایاند لە ماوەى ٤٠ خولەکدا دەستیان بەسەر بارەگاى فەوجدا گرت، لە ئەنجامدا ١٤ چەکدارى بەکرێگیراو و ئەفسەرێک بە پلەى نەقیب کوژران و ٣٧یان بەدیل گیران، دیارە لەو شەڕەدا زیانەکانى هێزى حکومەت زۆر بوون، ئەوەندەى زانراوە بریتیبوون لە تەقینەوەى کۆگاى فەوج، سووتانى ٤٠ خێمەى سەربازى، سووتانى ٣ ئۆتۆمبێلى جۆرى تۆیۆتا و دوو ئۆتۆمبێلى جۆرى ئێڤاى سەربازى.
لەو شەڕەدا هێزى پێشمەرگە دەستکەوتى زۆرى هەبوو وەک دەستبەسەرداگرتنى ٢ ئۆتۆمبێلى جۆرى پیکەب نیسان، یەک تۆیۆتاى کڕۆنا، یەک لاندکرۆز، ئۆتۆمبێلێکى گەورەى گواستنەوەى کەلوپەل، ٤ چەکى جۆرى کلاشینکۆف، ٦ (ئاڕ پى جی) و ٤٠ دانە گوللەى (ئاڕ پى جى)، یەک ڕەشاش (ئاڕ بی کەى)، ٢ ئامێرى دووربین و دەزگایەکى تەلەفۆن.
لە تۆمارکردنى ئەو داستانەدا هێزى پێشمەرگە بێ زیان نەبوون، کە تێیدا ٤ پێشمەرگە شەهید بوون بە ناوەکانى ساڵح محەمەد ستار ناسراو بە ڕێبوار کە پێشمەرگەى بارەگاى لق بوو، ڕزگار حەمید پێشمەرگەى لێژنەى ناوچەى چەمچەمال، جەبار غەفور ناسراو بە دێوانە پێشمەرگەى لێژنەى ناوچەى شوان، ساڵح محەمەد ساڵح ناسراو بە مام ساڵح پێشمەرگەى لێژنەى ناوچەى دووز، هەروەها ١٣ پێشمەرگەی دیکەش بریندار بوون.
گومان لەوەدا نیە ئەو جۆرە چالاکییانەى هێزى پێشمەرگە ڕۆڵێکى ئەرێنى و گرنگیان دەگێڕا لەسەر بەرزبوونەوەى ورەى پێشمەرگە و شادى خستنە دڵى جەماوەر، بەوەى کە هێز و بازووى شۆڕش لەو ئاستەدایە هەرکاتێ مەبەستیان بێ لە هەر شوێنێک بێت گورز لە هێزەکانى حکومەت دەوەشێنن، لە هەمان کاتیشدا ترس و دڵەڕاوکێیەکى زۆرى دەخەستە ناو ڕیزەکانى هێزە سەربازیەکان و بە ناچارى بۆ ڕەواندنەوەى ئەو ترس و دڵەڕاوکێیە پەنایان دەبردە بەر تۆپباران و بۆردمانى لادێکانى کوردستان.
سەرچاوەکان:
١- مهسعود بارزانی، بارزانی و بزوتنهوەی ڕزگاریخوازی كورد، بهرگی چوارم، ١٩٧٥-١٩٩٠ شۆڕشی گوڵان، بهشی دووەم، چاپی یهكهم، (چاپخانهی ڕوكسانا- هەولێر- ٢٠٢١).
٢- غازى عادل گەردی، پێشمەرگەیەک لە خزمەت رێبازى بارزانیدا حەجى بیڕۆخى بەرگى دووەم، چاپى دووەم، (تورکیا- ٢٠٢١).
٣- شیمال زێباری، هندەك ڕاستیێن ڤهشارتی د شۆڕشا گولانێدا، چاپی یهكهم، (چاپخانهی ڕۆژههڵات- ههولێر- ٢٠١٥).
