شەکیب سه‌عید شه‌ریف ڕەشید، ناسراو به شه‌كیب ئاكره‌یی، یاساناس و سیاسه‌تمه‌دار، ساڵی ١٩٦٦ یاریده‌ده‌ری به‌رپرسی لێژنه‌ی كاروباری هه‌واڵگری و ئاسایشی نووسینگه‌ی جێبه‌جێكاری (المكتب التنفیذي) ئه‌نجوومه‌نی سه‌ركردایه‌تی شۆڕش له كوردستانی عێراق بووه، ساڵی ١٩٦٧ له دامه‌زرێنه‌رانی ده‌زگای پاراستن و جێگری سه‌رۆكی ئه‌م ده‌زگایه بووه، ساڵی ١٩٦٧ له كۆنفڕانسی سه‌ربازی ـ ڕامیاری كانی سماق وساڵی ١٩٧٣ له كۆنفڕانسی ڕامیاری ـ سه‌ربازی چۆمان له پارێزگای هه‌ولێر به‌شدار بووه، ساڵی ١٩٧٠ له كۆنگره‌ی ههشتهم به ئه‌ندامی كۆمیته‌ی ناوه‌ندی پارتی دیموكراتی كوردستان هه‌ڵبژێردراوه.
ژیاننامه
شەکیب سه‌عید شه‌ریف ڕەشید له شاری ئاكرێ دایكبووه، ساڵی ١٩١٤ ئه‌حمه‌دی ئه‌ندامی بنه‌ماڵه‌كه‌ی له‌سه‌ر پشتیوانی له شێخ عه‌بدولسه‌لامی دووه‌می بارزانی له شاری موسڵ به‌ند ده‌كرێ و هه‌ر له به‌ندیخانه‌ی موسڵ كۆچی دوایی كردووه، ساڵی ١٩٥٨ په‌یوه‌ندی به ڕیزه‌كانی پارتییه‌وه كردووه، ساڵی ١٩٦٠ به‌كالۆریۆسی به‌شی مافی له زانكۆی به‌غدا وه‌رگرتووه، ساڵی ١٩٦١ به‌ڕێوه‌به‌ری ناحیه‌ی دوایه له پارێزگای ناسڕییه له باشووری عێراق بووه، ساڵی ١٩٦٢ په‌یوه‌ندی به ڕیزه‌كانی هێزی پێشمه‌رگه‌وه كردووه، له ٢٣ی كانوونی یه‌كه‌می ١٩٦٢ له‌لایه‌ن دادگای سه‌ربازی گشتی له پارێزگای زیقار سامانی گواستراوه و نه‌گواستراوه‌ی لێ زه‌وت كراوه، ساڵی ٢٠١٧ كوچی دوای كردووه، شاره‌زای زمانی كوردی، عه‌ره‌بی و ئینگلیزی بووه.
خه‌باتنامه
شەکیب سه‌عید شه‌ریف ڕەشید ساڵی ١٩٦٤ نوێنه‌ری كۆنگره‌ی شهشهمی پارتی دیموكراتی كوردستان له شارۆچكه‌ی قه‌ڵادزێی سه‌ر به پارێزگای سلێمانی بووه، ساڵی ١٩٦٦ به‌رپرسی دارایی پارتی دیموكراتی كوردستان بووه، له سه‌ره‌تای مانگی ئاداری ١٩٦٦ به‌شداری خولێكی سێ مانگه‌ی پاراستن له هه‌نده‌رانی كردووه، ساڵی ١٩٦٦ نوێنه‌ری كۆنگره‌ی حه‌وته‌‌‌می پارتی دیموكراتی كوردستان له شاره‌دێی گه‌ڵاڵه‌ی سه‌ر به پارێزگای هه‌ولێر بووه، ساڵی ١٩٦٦ یاریده‌ده‌ری به‌رپرسی لێژنه‌ی كاروباری هه‌واڵگری و ئاسایشی نووسینگه‌ی جێبه‌جێكاری (المكتب التنفیذي) ئه‌نجوومه‌نی سه‌ركردایه‌تی شۆڕش له كوردستانی عێراق بووه، ساڵی ١٩٦٧ له دامه‌زرێنه‌رانی ده‌زگای پاراستن و جێگری سه‌رۆكی ئه‌م ده‌زگایه بووه، له ١٥ی نیسانی ١٩٦٧ به سه‌رپه‌رشتی سه‌رۆك مستەفا بارزانی وه‌ك نوێنه‌ری ده‌زگای پاراستنی شۆڕشی ئەیلوول نوێنه‌ری كۆنفڕانسی سه‌ربازی ـ ڕامیاری كانی سماق (هه‌ولێر) بووه، له ساڵانی (١٩٦٨-١٩٦٩) مامۆستای وانه‌ی ئاسایشی شۆڕش له‌خولی یه‌كه‌می فێرگه‌ی پێگه‌یاندنی كادیری پارتی دیموكراتی كوردستان له گوندی چۆمانی سه‌ر به پارێزگای هه‌ولێر بووه، ساڵی ١٩٦٩ مامۆستای وانه‌ی پاراستن له خولی دووه‌می فێرگه‌ی پێگه‌یاندنی كادیری پارتی دیموكراتی كوردستان له گوندی ناوپردانی سه‌ر به پارێزگای هه‌ولێر بووه، ساڵی ١٩٧٠ له‌لایه‌ن نوێنه‌رانی كۆنگره‌ی ههشتهم به ٢١٠ ده‌نگ به ئه‌ندامی كۆمیته‌ی ناوه‌ندی پارتی دیموكراتی كوردستان هه‌ڵبژێردراوه، له كۆتایی مانگی ئایاری ١٩٧٠ سه‌ردانی گڵكۆی شه‌هید عه‌بدولعه‌زیز ئه‌تروشی (١٩٣٧-١٩٦٩) له شارۆچكه‌ی هه‌ڵه‌بجه‌ی سه‌ر به پارێزگای سلێمانی كردووه، له ١٥ی ته‌ممووزی ١٩٧٠ به‌شداری له مه‌راسیمی كردنه‌وه‌ی كۆنگره‌ی شهشهمی یه‌كێتی قوتابیانی كوردستان له گوندی ناوپردان سه‌ر به پارێزگای هه‌ولێر كردووه.
ساڵی ١٩٧٠ به‌شداری ئاهه‌نگی میوانداری مامۆستایانی خولی سێیه‌می فیرگه‌ی پێگه‌یاندنی كادیری پارتی دیموكراتی كوردستانی له ناوچه ئازادكراوه‌كانی پارێزگای هه‌ولێر كردووه، له ڕۆژی هه‌ینی ٣٠ی ئاداری ١٩٧٣ به‌شداری میهره‌جانی نه‌ورۆزی چۆمان كردووه، له ١٨ی نیسانی ١٩٧٣ به‌شداری له كردنه‌وه‌ی نه‌خۆشخانه‌ی سیلی چۆماندا كردووه، ساڵی ١٩٧٣ مامۆستای وانه‌ی پاراستن بووه له خولی چواره‌می فێرگه‌ی پێگه‌یاندنی كادیری پارتی دیموكراتی كوردستان له گوندی ناوپردان، له ڕۆژانی ٢٧ تا ٢٩ی تشرینی دووه‌می ١٩٧٣ به‌شداری له كۆنفڕانسی ڕامیاری ـ سه‌ربازی چۆماندا كردووه، ساڵی ١٩٧٤ مامۆستای وانه‌ی پاراستن له خولی پێنجه‌می فێرگه‌ی پێنجه‌می كادیری پارتی دیموكراتی كوردستان له گوندی زینوێی شێخی سه‌ر به پارێزگای هه‌ولێر بووه، ساڵی ١٩٧٤ مامۆستای وانه‌ی پاراستن و شه‌ڕی ده‌رونی خولی شهشهمی فێرگه‌ی پێگه‌یاندنی كادیری پارتی دیموكراتی كوردستان له گوندی زینوێی شێخ سه‌ر بووه، ساڵی ١٩٧٥ له دوای نسكۆی شۆڕشی ئەیلوول وه‌ك په‌نابه‌ر له شانشینی ئێران بووه، ساڵی ١٩٧٥ وه‌ك په‌نابه‌ر ڕووده‌كاته شانشینی یه‌كگرتووی بریتانیا، ساڵی ١٩٧٦ ڕووی له ویلایه‌ته یه‌كگرتووه‌كانی ئه‌مریكا كردووه و له‌وێ نیشته‌جێ بووه. له ٥ی كانوونی یه‌كه‌می ١٩٧٩ بڕیاری زه‌وتكردنی سامانی گواستراوه و نه‌گواستراوه‌ی دووپات كراوه‌ته‌وه، ساڵی ١٩٨٠ دكتورای یاسا له ویلایه‌ته یه‌كگرتووه‌كانی ئه‌مریكا وه‌رده‌گرێ، له ٢٣ی تشرینی یه‌كه‌می ٢٠١٧ به‌هۆی نه‌خۆشییه‌وه له یه‌كێك له نه‌خۆشخانه‌كانی ویلایه‌ته یه‌كگرتووه‌كانی ئه‌مریكا كۆچی دوایی كرد. شاره‌زای زمانی كوردی، عه‌ره‌بی و ئینگلیزی بووه.
له به‌رهه‌مه‌كانی:
١.سنوات المحنة في كردستان أهم الحوادث السیاسیة والعسكریة في كوردستان والعراق من١٩٥٨ الی ١٩٨٠ـ٢٠٠٧.
٢.رسائل من كوردستان ـ ٢٠١١.
٣.صدام الحسین نهوضا و نكوسا ٢٠١٧.
سه‌رچاوه‌كان:
- ئـه‌رشیفی ده‌سته‌ی ئینسكلۆپیدیای پارتی دیموكراتی كوردستان.
- شكیب عقراوي، رسائل من كردستان، (أربیل ـ مطبعه شهاب ـ ٢٠١١م)، ص ص ١، ٣٤٣.
- شكیب عقراوي، صدام حسین نهوضا و نكوسا، (أربیل ـ مطبعة حاجي هاشم ـ ٢٠٠٩م)، ص ص ١ ـ ٤٤٠.
- شوان محه‌مه‌دئه‌مین ته‌ها خۆشناو، هه‌ولێر له نێوان ساڵانی ١٩٦٣ ـ ١٩٧٠ لێكۆڵینه‌وه‌یه‌كی مێژووییه له بارودۆخی سیاسی، (هه‌ولێر ـ چاپخانه‌ی زانكۆی سه‌ڵاحه‌ددین ـ ٢٠١٦ز)، ل ٣٠٤.
- قرار الهیئة العامة لادارة وتصفیة الأموال المحجوزة رقم ٤٤٧٨، جریدة الوقائع العراقیة، وزارة العدل، العدد ٢٧٦١، السنة الثانیة والعشرون، بغداد، ١٠ آذار ١٩٨٠م، ص ٢٧.
- مسعود البارزاني، البارزاني والحركة التحرریة الكردیة، المجلد الثالث، الطبعة الثانیة، (أربیل ـ مطبعة وزارة التربیة ـ ٢٠٠٢م)، ص ص ١٨٨، ٢٥٣.
