سەلیم ئەحمەد سەلیم ڕەشۆ، ساڵی ١٩١٤ لە گوندی چیێ لەدەڤەری نێروە و ڕێکان سەربەقەزای ئامێدی پارێزگاى دهۆک لەدایک بووە،
ساڵی ١٩٤٥ بەشداری شۆڕشی دووەمى بارزانی کردووە، ساڵى١٩٦١ لەگەڵ هەڵگیرسانى شۆڕشى ئەیلوول، پەیوەندی بە هێزى پێشمەرگەى شۆڕشەوە کردووە و لەشەڕی گەلی زاویتە و شەڕەکانی بادینان لەساڵانی ١٩٦١، ١٩٦٢ بۆ دەرکردنی سوپای عێراق و جاشەکان لەناوچەکە بەشدارى کردووە. سینار ئەحمەدی برای لە ساڵی ١٩٦١ شەهید بووە.
ساڵی ١٩٦٢ لەگەڵ مەلا مستەفا بارزانی پەڕیوەتەوە بۆ ناوچەی سۆران و دەڤەری باڵەک، لە شەڕی سۆفیەکانی سەربە شێخ ڕەشیدی لۆڵان و شەڕی سەفین بەشداری کردووە، ساڵی ١٩٦٥ لە شەڕی قەرەداغ، شەڕی پیرەمەگرون، شەڕی سەری سپیلک، شەڕی کێوەڕەش، شەڕی دێرێ لەدەڤەری ئامێدی، شەڕی گەلی عەلی بەگ لە ناحیەى دیانا و دەڤەری دۆسکی بەشداری کردووە. ساڵى ١٩٧٥ دوای نسکۆی شۆڕشی ئەیلوول ئاوارەى وڵاتى ئێران دەبێت و لە شارى نەغەدەى ڕۆژهەڵاتی کوردستان نیشتەجێ دەبێت و لەوێوە لەگەڵ بنەماڵەکەی ڕەوانەی شارى سەبزەوار لە پارێزگاى خوراسان کراوە و دواتریش گواستراوەتەوە بۆ شارى شارودی پارێزگاى سمنان.
ساڵی ١٩٧٧ بەشداری شۆڕشی گوڵان دەکات هەر لەو ساڵەدا کوڕێکی بەناوی حەجی سەلیم شەهید بووە. ساڵی ١٩٨٢ لەسەر ڕاسپاردەى ئیدریس بارزانى لەگەڵ دوو کوڕ و برازایەکی و ژمارەیەک پێشمەرگەی دیکە گەڕاوەتەوە بۆ گەلی ڕەش، چیای برادۆست، ناوچەی خواکوڕک و بەشێوەی مەفرەزەی گەڕۆک دەستی لەدوژمن وەشاندووە. ساڵى ١٩٩١ گەڕاوەتەوە باشوورى کوردستان و بەشدارى ڕاپەڕینى جەماوەرى کوردستانى دژى دامودەزگاکانى حکومەتى عێراق کردووە.
لە ١٦ی ئابی ١٩٩٦ لە یۆبیلی زێڕینی پارتی بەهۆی ئەو خزمەتانەی پێشکەشی کورد و کوردستان و ڕێبازی بارزانی کردووە، لەلایەن سەرۆک مەسعود بارزانی مەدالیای بارزانی نەمری پێ بەخشراوە. لە ڕۆژی ٢١ی تشرینی دووەمی ساڵی ٢٠٠٥ بەهۆی نەخۆشیەوە کۆچی دوایی کرد.
سەرچاوە:
١-ئەرشیفى دەستەى ئینسکلۆپیدیاى پارتى دیموکراتى کوردستان.
