شەهید ساڵح محەمەد عەبدولکەریم محەمەد، ساڵی ١٩٦٠ لە شاری کەرکووک لەدایک بووە، تاکو شەشی سەرەتایی خوێندوویەتی.
ساڵی ١٩٧٥ دوای نسکۆی شۆڕشی ئەیلوول، پەیوەندى بە ڕێکخستنەکانى پارتی دیموکراتی کوردستان لە لێژنەی ناوچەی سلێمانی سەربە لقی چوارەوە کردووە، لەگەڵ هەڤاڵانی چەندین چالاکی لەناو شار ئەنجام داوە، لەساڵی ١٩٨١ لە کاتی ئەنجامدانی چالاکییەک لەناو شاری سلێمانی، لەگەڵ دوو هەڤاڵی تری، ڕووبەڕووی پیاوانی ڕژێم بوونەتەوە و شەڕى دەستە و یەخە دروست بووە، دواتر دەستگیر کراوە و خۆی بە ئەفسەرێکی پلە باڵا ناساندووە، دواتر بە بەندکراوی ڕەوانەی بەسرا کراوە بۆ ئەو یەکە سەربازیەی کە گوایە تێیدا ئەفسەرە، لەوێ پەلاماری ئەو کەسە دەدات کە بردوویەتی، کوشتوویەتی و دەمانچەکەی لێ بردووە، دوای چەند ڕۆژێک گەڕاوەتەوە بۆ شاری سلێمانی و ڕووی کردۆتە شاخ و بۆتە پێشمەرگە لە لێژنەی ناوچەی چوارتا لە سنووری لقی چوار، لەچەندین چالاکی ناو شاری سلێمانی و شارۆچکەی چوارتا و ڕێگای نێوان عەربەت و سلێمانی بەشدار بووە، لەساڵی ١٩٨٣ نێردراوە بۆ ناو شاری سلێمانی بۆ دووبارە ڕێکخستنەوەى مەفرەزەیەکی چالاک بۆ لێدانی پیاوانی ڕژێمی بەعس، مەفرەزەیەکی چالاک لە چەندین هەڤاڵی پارتی دروست کردووە کە چەندین چالاکی بوێرانە و سەرکەوتووانەیان ئەنجامدا، لە هەمان ساڵدا لەگەڵ چەند هەڤاڵێکی و لەکاتی ئەنجامدانی چالاکییەک بۆ بڵاوکردنەوەی پۆستەر و نووسینی سەر دیوار لەناو شاری سلێمانی، کەوتوونەتە ناو بۆسەی مەفرەزەیەکی بەعس و دەستگیر کراون، بەڵام دواتر بە هەوڵی پارتی و سەرکردە ئیدریس بارزانی، لە ڕێگەی فەرماندەی مەفرەزەیەکی هەواڵگری بەعس ناچار دەکرێت کە ئازاد بکرێن.
لە ڕۆژی ٩ی نیسانی ١٩٨٤، لەکاتی گەڕانەوەی لە ئەنجامدانی چالاکییەکی سەربازی لەناو شاری کەرکووک، بەهۆی ئاشکراکردنیەوە لەلایەن کەسێکی ناپاک، لە بازگەی نێوان کەرکووک و سلێمانی لەلایەن ڕژێمی بەعسەوە دەستگیرکراوە، دوای یانزە مانگ لە بەندکردنی، لە ١٧ی شوباتی ساڵی ١٩٨٥، لە بەندیخانەی ئەبوغرێب لەلایەن ڕژێمی بەعسەوە لەسێدارە دراوە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
