ساڵح عومەر مستەفا ساڵی ١٩٤٠ لە گوندی بێدود لە قەزای مێرگەسۆری سەر بە پارێزگای هەولێر لە دایک بووە، خێزاندار بووە، ساڵی ١٩٦١ پەیوەندی بە شۆڕشی ئەیلوولەوە دەکات و لە شەڕەکانی چیای مەتین، گەلی زاوێتە، داستانی لۆمانا، گوندی بریفکا، چیایی ئەترۆش، مرێبا، خۆرت و دەکان، شەرمن و چیای ئاکرێ، کانی ماسێ و چیای پیرس (١٩٦١- ١٩٦٣) و شەرەکانی سەرتەک، گۆڕەز، گەروی عومەرئاغا، رێزان و بێلول بەشدار بووە و لەو ماوەیدا دوو جار بریندار بووە.
ساڵی ١٩٧٥ و دوای نسکۆی شۆڕشی ئەیلوول ئاوارەی وەڵاتی ئێران بووە و دوای سەرکەوتنی شۆڕشی گەلانی ئێران لە ١٠ی شوباتی ١٩٧٩ جارێکی دیکە پەیوەندی بە شۆڕشی گوڵانەوە دەکات و دەبێتە ئامر بەتاڵیون و دواتر بە هۆکاری لێهاتوویی دەبێتە ئامر هێز بەشداری زۆرێک لە شەڕ و پێکدادانەکانی شۆڕشی گوڵان لەگەڵ سوپای عێراق دەکات لەوانەش شەڕەکانی مێرۆز، رێزان، خێرەزۆک، کانی رەش و سیدەکان.
ساڵح عومەر مستەفا لە ٣١ی تشرینی دووەمی ١٩٨٣ و لە هێرش بۆ سەر سەنگەرەکانی دوژمن لە گەروی سارک و سەری تالاو و دوای رۆخاندنی سەنگەرەکانی سوپای عێراق و بەئەنجام گەیشتنی ئەو ئامانجە شەهید بووە.
سەرچاوەکان:
١- رۆژنامەی خەبات، ژمارە ٥٥٦- ٥٥٧، ئادار و نیسانی ١٩٨٥، ل ٣.
٢- ئەرشیفى دەستەی ئینسکلۆپیدیای پارتی دیموکراتی کوردستان.
