خالید شلی لە ساڵی ١٩٤٣ لە گوندی شلی سەر بە ناحیەی ئامێدی لەدایک بووە، ساڵی ١٩٦٢ پەیوەندی بە هێزى پێشمەرگەی شۆڕشی ئەیلوول کردووە، دوای نسکۆی شۆڕشی ئەیلوول لەساڵی ١٩٧٥ گواستراوتەوە ئوردۆگای زێوە لە ڕۆژهەڵاتی کوردستان، بەرپرسی چاودێری ئاوارەکانی کۆمەڵگای زێوە بووە، دواتر گواستراوەتەوە بۆ پارێزگای ئەهواز و شاری شوشتەر، ساڵى ١٩٩١ لەکاتى ڕاپەڕینى جەماوەرى کوردستان لەگەڵ سەرۆک مەسعود بارزانی هاتۆتە شارۆچکەى دیانا، و بەشدارى ڕاپەڕینى جەماوەرى باشوورى کوردستانی کردووە، دواتر لە پارێزگاى دهۆک نیشتەجێ بووە. ساڵی ١٩٩٨ کراوە بە ئەندامی دەزگای ئەیلوول، و ساڵی ٢٠٠٤ بووتە بەرپرسی دەزگای ئەیلوول لە ئاکرێ و ساڵی ٢٠١٣ خانەنشین کراوە.
لەساڵی ١٩٦٢ سەربازی عێراق بووە کاتێک پەیوەندی کردووە بە شۆڕشی ئەیلوول و لە بەرواری ژێری و لەلای فەرماندە مەحمود ئاغای چەمانکێ بۆتە پێشمەرگە، لەهەمان ساڵدا و دوای دەرکردنی سوپای عێراق و جاشەکانی لەدەڤەری بادینان، بارزانی ئەو هێزانەی بادینان لە سێ هێزدا ڕێکخست و بەرپرسیارێتی دەڤەرەکەی بە ئەسعەد خۆشەوی سپارد، عیسا سوار و عەلی خەلیل و حەسۆ میرخانی کردە فەرماندەی ئەو سێ هێزانە، خالید شلی کرا بە سەرقۆڵ لە هێزی ئاکرێ و شێخان کە حەسۆ میرخان فەرماندەی بوو. ساڵی ١٩٧٣ کرا بە سەرپەل لە بەتالیۆنی یەکی هێزی شێخان کە ئیسماعیل موسا فەرماندەی بەتالیۆن بووە، ساڵی ١٩٧٤کراوە بە فەرماندەی بەتالیۆنی هێزی بەرگری میللی لە ڕۆژهەڵاتی شارى موسڵ.
ساڵی ١٩٧٩ بە ڕاسپاردەی ئیدریس بارزانی گەڕاوەتەوە بۆ ئوردۆگای زێوە، لەهەمان ساڵدا و دوای کۆنگرەی نۆی پارتی، لەگەڵ دکتۆر جەرجیس حەسەن ناسراو بە (دکتور جەرجیس خنسی) و ٢٥ پێشمەرگەی تر گەڕاوەتەوە بۆ لقی یەک لە کۆماتە لەسەر سنووری باشوور و باکووری کوردستان، ساڵی ١٩٨٠ کراوە بە ئەندامی لێژنەی ناوچەی شێخان و بەرپرسی ڕێکخراوی شەهید فازڵ شلی لە ناوچەی شێخان و وەک مەفرەزەی گەڕۆک دەستیان لە دوژمن وەشاندووە و چەندین چالاکى پارتیزانییان ئەنجام داوە. لە ساڵی ١٩٨١ گەڕاوەتەوە بۆ زێوە، ساڵی ١٩٨٧ لەگەڵ سەرۆک مەسعود بارزانی و بەشێک لەئەندامانی مەکتەب سیاسی هاتووەتەوە بۆ لقی یەک لە ناوچەی نێروە و دووتازە، ساڵی ١٩٨٨ گەڕاوەتەوە بۆ زێوە، لەهەمان ساڵدا چووەتە ناوچەی خواکوڕک بۆ بەشداریکردن لەداستانی خواکوڕک و لە شەڕەکانی سەری کۆراوە و قەبری زاهیر بەشداری کردووە و دوای کۆتای هاتنی ئەم شەڕە گەڕاوەتەوە بۆ ئۆردوگاى زێوەی ڕۆژهەڵاتى کوردستان.
ساڵى ١٩٩١ لە سەروبەندى ڕاپەڕینى جەماوەرى کوردستان لەگەڵ سەرۆک مەسعود بارزانى هاتۆتە شارۆچکەى دیانا، دواتر ڕەوانەی دەڤەری ڕێکان کراوە و بە فەرماندەیی هێزێکی ٥٠ کەسی چووەتە زاخۆ، لەساڵی ١٩٩٢ کراوە بە فەرماندەی بەتالیۆنی هاوبەشی نێوان پارتی و یەکێتی لە شێخان، لەمانگی ئەیلوولی هەمان ساڵ بەرپرسی سەربازی بووە لە لەشکری پێنجی شێخان، ساڵی ١٩٩٨ کراوە بە ئەندامی دەزگای ئەیلوول.
خالید شلی لەژیانی پێشمەرگایەتیدا لەچەندین شەڕدا بەشدار بووە و لە ساڵی ١٩٨١ لە شەڕی کۆنەلاجان و دەربەند لە ورمێ لە ڕۆژهەڵاتى کوردستان بریندار بووە.حازمی برای لەشەڕی خواکوڕک (١٩ی تەمووز- ٥ی ئەیلوولی ١٩٨٨) شەهید بووە، ساڵی ٢٠١٤ لە سەرەتای شەڕی داعش ( ٢ی ئابی٢٠١٤- ١٧ی تشریتی یەکەمی ٢٠١٦) جەمیلی برای شەهید بووە.
لە ١٦ی ئابی ١٩٩٦ لە یۆبیلی زێڕینی پارتی بەهۆی ئەو خزمەتانەی پێشکەشی کورد و کوردستان و ڕێبازی بارزانی کردووە، لەلایەن سەرۆک مەسعود بارزانی مەدالیای بارزانی پێ بەخشرا، ساڵی ٢٠٠٤ بەرپرسی دەزگای ئەیلوولە لە ئاکرێ بووە، لە ساڵی ٢٠١٣ خانەنشین کراوە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
