ژیاننامە
خالید ساڵح ئیبراهیم خەتیب، ساڵی ١٩٥٤ لە پارێزگای سلێمانی لە دایکبووە، هه‌ر له‌وێش ئاكنجی بووه، تا قۆناغی ناوه‌ندی هه‌ر له‌و شاره‌ی خوێندووه، ساڵی ١٩٧٨ لە سێدارە دراوە.
خەباتنامە
شەهید خالید ساڵح ئیبراهیم خەتیب، ساڵی ١٩٦٨ بۆتە کادری شانەی نهێنی نەخۆشخانەی سلێمانی کە دکتۆرە مونیرە ساڵحی خوشکی بەرپرسی شانەکە بووە، شەونم نەجمەدین بەرزنجی سەرپەرشتیاری ڕێکخستنی شانە نهێنیەکانی ناوچەی سلێمانی لقی چواری پارتی دیموکراتی کوردستان بووە، هەروەها محێدین ڕەحیم بەرپرسی لێژنە ناوچە بووە.
ئەرکی خالید ساڵح ئیبراهیم پاسەوانیکردنی کات و شوێنی کۆبوونەوەکانی شانە نهێنیەکان بووە لە هەمانکاتدا چەند چالاکییەکی چەکداری لەگەڵ دوو هەڤاڵی تری لەناو شاری سلێمانی ئەنجام داوە، دیارترینییان چالاکی سەرشەقام و چالاکی ناو باخی سەرچنار بووە، لەگەڵ ئەوەشدا خالید ساڵح ئیبراهیم خەتیب کادری دابەشکردن و نووسینی پەیامەکانی شۆڕش بووە لەناو بازاڕی شاری سلێمانی.
ساڵی ١٩٧٨ چەند هەڤاڵێکی لە لایەن ئەمنی سلێمانیەوە دەستگیر کراون و دوای چەند ڕۆژێک لە ٤ی ئاداری ١٩٧٨ لە ڕێگەی چوونی بۆ قوتابخانە خۆیشی دەستگیر کراوە و لە هەمانکاتدا هەڤاڵێکی تری بەناوی نورەدین نەجمەدین بەرزنجییش لەناو بازاڕی سلێمانی دەستگیر کراوە، دوای دوو هەفتە مانەوە لە ئەمنی سلێمانی گوازراونەتەوە بۆ ئەمنی گشتی شاری بەغدا، لە ٧ی ئایاری ١٩٧٨ خالید ساڵح ئیبراهیم خەتیب و نورەدینی هەڤاڵی لە ئەمنی گشتی بەغدا لە سێدارە دراون و شەهید بوونە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
