دواى ڕووخانى ڕژێمى شای ئێران، پێشمەرگەیەکى زۆر ڕووى لە باشوورى کوردستان کردەووە، ماڵى دایکە حەلیمە ببوو بە پەناگەی هێزى پێشمەرگە. لە سەرەتای ساڵی ١٩٨٢ یەکێک لە کوڕەکانى بە ناوى ئەیووب دەبێت بە پێشمەرگە و لە ڕۆژى ١٠ی شوباتى ١٩٨٢ لە گوندى گەوەڕکى شەهید دەبێت. دواى ئەو کوڕێکی دیکەی بە ناوی ئیسماعیل دەبێت بە پێشمەرگە و لە ٢٩ی ئەیلوولى ١٩٨٤ لەچیاى کەمەکا لە نزیک گوندەکانى ئەمینکێ و بابۆخکێ شەهید دەبێت و تەرمەکەى دەکەوێتە دەست سوپاى عێراق. کوڕى سێیەمى دایکە حەلیمە بە ناوى سەلاح پاش شەهیدبوونى براکانى بۆتە پێشمەرگە و لە ٢٠ی تەمووزى ١٩٨٦ لە دەڤەرى ئاکرێ شەهید کراوە. لە دوای شەهیدبوونی براکانى کوڕى چوارەمى دایکە حەلیمە بە ناوى محەمەد ناسراو بە حەمۆ پەیوەندی بەهێزى پێشمەرگەوە دەکات و ئەویش لە ١٩ی نیسانى ١٩٨٧ لە سەر ڕێگەى گشتیی دهۆک ئامێدى شەهید بووە.
بەردەوام لە دەڤەرەکەدا ماڵى دایکە حەلیمە وەک بارەگاى هێزى پێشمەرگە تەماشاکراوە و جێی ڕێز و خۆشەویستیی خەڵک بووە. ساڵى ١٩٨٥ ماڵى خۆى بردووەتە ناوچە ئازادکراوەکان، لە گوندى بادیا و بۆتیا لە ناوچەى زاویتە و قازیاوە نیشتەجێ بووە. ساڵى ١٩٨٨ پاش پڕۆسەى ئەنفال و کیمیابارانکردنى دەڤەرەکە لەلایەن ڕژێمى عێراقەوە، لەگەڵ منداڵەکانى هەوڵى چوونى بۆ باکوورى کوردستان داوە، بەڵام لەلایەن سوپاى عێراقەوە ڕێی لێگیراوە و بەناچارى گەڕاوەتەوە و تا ماوەیەک لە دارستانێک خۆى حەشارداوە، دواتر لە لایەن ڕژێمەوە دەستگیر دەکرێن و ماوەى ١٤ ڕۆژ زیندانی کراون و پاشان بەهۆى ناڕەزایەتى خەڵکى ناوچەکەوە ئازادکراون.
ساڵى ١٩٩١ یەکێک بووە لە پێشڕەوانى ڕاپەڕینى خەڵکى کوردستان، لەبەر ئازایەتى و خۆڕاگرى، لە ١٦ی ئابى ١٩٩٦ لە یۆبیلى زێڕینى پارتى دیموکراتى کوردستاندا، میدالیاى بارزانیی پێ بەخشراوە.
سەرچاوە:
١.ئەرشیفی دەستەی ئینسکلۆپیدیای پارتی دیموکراتی کوردستان.
