ژیاننامە
حسێن محەمەد عەلی خان مەحمود کە ناسراوە بە حسێنی فاتە، ساڵی ١٩٥٠ لە گوندی دۆڵی ناوحەدی دەڤەری شەمێرانی سەر بە قەزای دەربەندیخان لە دایکبووە، گوندنشین بووە و سەرقاڵی کاری جوتیاری بووە، برایەکی بەناوی سلێمانی فاتە لە ساڵی ١٩٨١ شەهید بووە، لە دوای نسکۆی شۆڕشی ئەیلوول ساڵی ١٩٧٥ ئاوارەی وڵاتی ئێران بووە و لە نیشینگەی (ئەنزڵ) نزیک شاری سەرپێڵی زەهاو نیشتەجێ بووە، حسێن محەمەد حسێنی فاتە خێزاندار بووە و خێزانی ناوی شەمسە ئەحمەد بووە و خاوەنی یەک کوڕ و سێ کچ بووە بەناوەکانی محەمەد، سارا، سەیران و تارا. ساڵی ١٩٧٨ شەهید بووە.
خەباتنامە
شەهید حسێن محەمەد لە شۆڕشی ئەیلوول ساڵی ١٩٦٥ بۆتە پێشمەرگە لە هێزی شەمێران، کە لەوکاتەدا هێزی شەمێران هێزێکی سەربەخۆ بووە و شەهید حەمە شەمێرانی فەرماندەی بووە و فەرمانی لە سەرکردایەتی شۆڕشەوە وەرگرتووە، هەروەها سنووری چالاکی ئەم هێزە لە دەڤەری شەمێران و دەڤەری نەوڕۆڵی بووە زیاتر، بەڵام دوای دروستکردنی پێکهاتەی سەربازی شۆڕشی ئەیلوول لە ساڵی ١٩٦٥ ئەو هێزە هەر وەک هێزێکی سەربەخۆ مایەوە و خرایە سەر هێزی خەباتی پارتی دیموکراتی کوردستان.
شەهید حسێن محەمەد بەشداری شەڕەکانی چیای زمناکۆ، شەڕی دەربەندیخان، شەڕی گەرمیان، خانەقین، شەڕی سەرتیز، شەڕی حاجی ئۆمەران و شەڕی شۆعیەکان کردووە، لە شەڕی چیای زمناکۆ لە ساڵی ١٩٦٧ بەسەختی بریندار بووە، ساڵی ١٩٦٨ پلەی سەرپەلی لە هێزی شەمێران وەرگرتووە.
ساڵی ١٩٧٦ لە دوای نسکۆی شۆڕش و ئاوارە بوونیان دووبارە پەیوەندی بە شۆڕشەوە كردووه و بۆتە پێشمەرگە لەلای قادری حەمەساڵح تاگۆزی کە لە شۆڕشی ئەیلوول سەرلقی چواری بەتالیۆنی شەشی بەمۆی هێزی خەباتی پارتی دیموکراتی کوردستان بووە.
ساڵی ١٩٧٨ حسێن محەمەد و دەستەیەک پێشمەرگەی هاوسەنگەری بۆ چالاکی پارتیزانی گەڕاونەتەوە شاری هەڵەبجە، لە بناری چیای بەمۆ کەوتوونەتە بۆسەی سەربازی ڕژێمی ئەوکاتی عێراق و حسێن محەمەد بە سەختی بریندار بووە و هاوسەنگەرانی بۆ وەرگرتنی چارەسەر گواستوویانەتەوە بۆ وڵاتی ئێران، بەڵام بەهۆی سەختی برینەکەیەوە دوای دوو ڕۆژ شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
