شەهید حسێن محەمەد فەرەج، لە ساڵی ١٩٥٢ لە گوندی موانەی کۆنی سەربە قەزای سەیدسادق لە دایکبووە، گوندنشین بووە و سەرقاڵی کاری جوتیاری بووە، تا قۆناغى سەرەتایی خوێندووە, حسێن محەمەد خێزاندار بووە و خێزانی ناوی نازدار عەبدوڵا بووە و خاوەنی یەک کچ بووە بەناوی ژیان.
ساڵی ١٩٦٨ پەیوەندی بە ڕیزەکانی پێشمەرگەی شۆڕشى ئەیلوول کردووە و لە لقی پێنج بە سەرپەرشتی ئەحمەد چەقژی سەربە بەتالیۆنی دەی پێنجوێن بە فەرماندەیی عەزیز ئەتروشی سەربە هێزی خەباتی پارتی دیموکراتی کوردستان بۆتە پێشمەرگە، لە ٨ی شوباتی ١٩٧١ بۆتە کادری یەکێتی لاوانی دیموکراتی کوردستان و سەرپەرشتی ڕێکخستنەکانی قەزای سەیدسادقی کردووە.
شەهید حسێن محەمەد بەشداری شەڕی جەلالیە کۆڵوانە سورەکان لە چیای شنروێ ساڵی ١٩٦٩، شەڕی کانی سارد ساڵی ١٩٧٤، شەڕی دەروازەی عەربەت ساڵی ١٩٧٤، شەڕی دەربەندیخان ساڵی ١٩٧٤ کردووە.
لە ٢٠ی نیسانی ١٩٧٤ لە ئەنجامی تۆپبارانی تۆپخانەکانی ڕژێمی ئەوکاتی عێراق بۆسەر سەنگەری بەرگری هێزی پێشمەرگە لە چیای زمناکۆی نزیک دەربەندیخان، حسێن محەمەد و سێ هاوسەنگەری بە ناوەکانی محەمەد مام عەول ناسراو بە حەمەسور، جەمال محەمەد ناسراو بە جەمال حەمەدێزی، ڕەحیم هەورامی شەهید بوونە.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
