جەبار ڕەحیم نادر ئەحمەد، ناسراو به جەبار ڕەحیم تاگۆزی، ساڵی ١٩٥٢ لە گوندی مۆرتکەی دەڤەری تاگۆزی سەربە پارێزگای هەڵەبجە لە دایکبووە، گوندنشین بووە و سەرقاڵی کاری جوتیاری و ئاژەڵداری بووە، لە دوای نسکۆی شۆڕشی ئەیلوول ئاوارەی وڵاتی ئێران بووە و لە گوندی شێخ سێڵەی سەربە شاری جوانرۆ نیشتەجێ بووە، خێزاندار بووە و خێزانی ناوی توبا فەتاح بووە و خاوەنی یەک کوڕ و دوو کچ بووە بەناوەکانی جەمیل و سوریا و ئامینە.
ساڵی ١٩٦٥ بۆتە پێشمەرگە لە لقی چواری بەتالیۆنی شەشی بەمۆی هێزی خەباتی پارتی دیموکراتی کوردستان، کە لەوکاتەدا شەهید قادر حەمەساڵح تاگۆزی سەرلقی چوار بووە و فازڵ تاڵەبانی فەرماندەی بەتالیۆن بووە، لە چه‌ندین شه‌ڕ له شۆڕشی ئەیلوول بەژداری کردووە لەوانه شەڕی بارزان، شەڕی زۆزک، شەڕی پێنجوێن، شەڕی خانەقین.
ساڵی ١٩٦٩ لە شەڕی خانەقین فیشەک بەر کەوتووە و بەسەختی بریندار بووە، هه‌مان ساڵ پلەی سەرپەلی وەرگرتووە، لە دوای نسکۆ و ئاوارەیی چەکی دانەناوە و هاوشانی هاوسەنگەرانی لە لقی تاگۆزی درێژەی بە خەباتی پێشمەرگایەتی خۆی داوە.
لە ٢٤ی نیسانی١٩٧٧ لە گوندی بانی بۆڵانی دەڤەری تاگۆزی، ڕووبەڕووی هێزێکی سەربازی ڕژێمی ئەوکاتی عێراق بوونەتەوە و لە ئەنجامدا جەبار ڕەحیم و له‌گه‌ڵ سێ له هاوسەنگەره‌كانی بەناوەکانی حەمەی حسێن، جەمیل کەریم، حەمەی عەزیز مەحمود شەهید بوون.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
