چالاکییەکانى پارتیزانى هێزى پێشمەرگەى کوردستان چەند جۆر و شێوازێک بوون، بەپێی ڕەخسانى هەلومەرجى شوێنى جوگرافى و دۆخى هێزى پێشمەرگە، یەکێک لە جۆرى چالاکییەکان دانانەوەى بۆسە بوو لەسەر ڕێگا و جادەکانى کە هێزە سەربازى و ئەمنیەکانى حکومەت هاتووچۆیان پێدا دەکرد بۆ ڕایی کردنى ئەرکى کە پێیان دەسپێردرا، بەشێک لەو ئەرکانە هەڵمەتە سەربازیەکان بوون بۆ سەر پێشمەرگە و گوند و لادێکانى کوردستان، دیارە بۆ ڕووبەڕوونەوەى ئەو هێزانە لەلایەن پێشمەرگەوە بۆسە دانانەوە بژاردەیەکى گونجاو بوو، وەک لە ئاماژەدا هاتووە چەندین چالاکى پێشمەرگەیی لەو چەشنە بەدی دەکرێن و زیانى زۆریان بە هێزە عێراقیەکان گەیاندووە.
هێزێکى بیست پێشمەرگەیی بە فەرماندەى زێرەڤان لە ناوچەى بامەڕنێ دەڤەرى بادینان لە جەولەدابوون، لە ١١ی شوباتی ١٩٨٨، کە گەیشتنە گوندى دهێ دواى پشوودانێکى کورت کۆبوونەوە، لەو کۆبوونەوەیەدا چۆنیەتى ئەنجامدانى چالاکییەکى پێشمەرگەییان تاوتوێ کرد، بڕیاریان دا کەوا بۆسەیەک لە شوێنێک بۆ هێزەکانى ڕژێمى بەعس دانێنەوە، دواى تێڕوانینێکى خێرا نزیک گوندى بەربانکێ ڕێگای نێوان بامەڕنێ و سکرینێ بە شوێنێکى گونجاو زانرا، ئامانج لەو چالاکییە پێگەیاندنى زیانێکى گەورە بوو بەو هێزانەى کە لەو ڕێگایەدا هاتووچۆیان دەکرد لەلایەک، لەلایەکى دیکەشەوە بوونى هێزى پێشمەرگە لە ناوچەکە بسەلمێنن و ترس و دڵەڕاوکێى زیاتر بخەنە ڕیزەکانى ڕژێمى بەعس، هێزەکەى پێشمەرگە شەو چوونە بامەڕنێ و مانەوە تا کاتژمێر ٤ى بەیانى، ئینجا بەرەو شوێنى بۆسە بەڕێکەوتن، دواى بڕینى ڕێگا بۆ ماوەى ٢ کاتژمێر، نزیک ٦ى بەیانى ١٢ی شوباتی ١٩٨٨ گەیشتنە شوێنى مەبەست، لەسەر ڕێگا بە نەخشەیەکى توکمە دابەشى سەر خاڵەکان بوون و خۆیان مەلاسدا لە چاوەڕوانى هاتنى هێزەکانى حکومەت تاکو لە پڕێکا هێرشیان بکەنە سەر و زیانیان پێ بگەیەنن، بۆ هێزەکانی حکومەتیش بسەلمێنن کە شۆڕش بەهێزە و هەرکاتێ و لە هەر شوێنێ بێ دەتوانێ گورزى گەورەیان لێبدات.
دواى ئەوەى بۆ ماوەى سێ کاتژمێر لە چاوەڕوانى هاتنى هێزەکانى سوپاى عێراق، بە دیاریکراوى کاتژمێر ٩ى پێش نیوەڕۆ ئۆتۆمبێلێکى هێزە ئەمنیەکانى بەعس بە ڕێگادا هات و ٨ سیخوڕى تێدابوو، پێشمەرگەکان کە لە دوورەوە بینیان خۆیان ئامادەکرد و لوولەى چەکەکانیان ئاراستەی ئۆتۆمبێلە سەربازییەکە کرد، هەرکە گەیشتە شوێنى بۆسەکە لە هەموو لایەکەوە لێیان ڕاپەڕین و دایانە بەر دەستڕێژی، بە چەکى کلاشینکۆف و بیکەیسى و ئاڕ پی جى بۆ ماوەى ١٦ خولەک لە شەڕێکى بەردەوام بێ ئەوەى بوار بە هێزەکەى حکومەت بدەن، کە بتوانن تەنانەت پارێزگارى لە خۆشیان بکەن، بەڵکو لەو ماوە کورتەدا بێدەنگیان کردن، لەو ٨ سیخوڕە چواریان کوژران و چوارەکەى تریش بەدیل گیران، کە دوانیان بریندار بوون و دوانەکەى تریش هیچیان بەرنەکەوتبوو ساغ بوون، چالاکییەکە لە ماوەیەکى کەمدا کۆتایی هات، هەموو چەکەکانیان دەستى بەسەردا گیرا، کە بریتى بوو لە ٧ کلاشینکۆف و یەک ئار پی جى، پاشان کە شەڕەکە کۆتایی هات و پێشمەرگە سەرکەوتنى بەدەست هێنا و ئامانجى پێکا بێ ئەوەى هیچ زیانیان پێ بگات، ئیتر مانەوەى پێشمەرگە لەو شوێنەدا هیچ سوودى نەبوو، بەڵکو پێویست بوو شوێنەکە زوو بەجێ بێڵن و خۆیان بگەیەننەن ناوچە ئازادکراوەکان لەگەڵ گواستنەوەى دیل و دەستکەوتەکانیان، بڕیارى کشانەوەیان دا و شوێنەکەیان جێهێشت.
سەرچاوەکان:
١- مه‌سعود بارزانی، بارزانی و بزوتنه‌وەی ڕزگاریخوازی كورد، به‌رگی چوار‌م، ١٩٧٥-١٩٩٠ شۆڕشی گوڵان، به‌شی دووە‌م، چاپی یه‌كه‌م، چاپخانه‌ی ڕوكسانا، ٢٠٢١.
٢-محەمەد مراد، خەباتا چیا، بیرهاتن و سەرهاتیێن شۆڕەشا گولانێ دناڤبەرا ساڵین (١٧٦-١٩٨٩) دا، چاپخانا کوردستانێ – زاخۆ، ٢٠٠٧.
