یاساناس و سیاسەتمەدار بڵند ئیسماعیل جه‌رجیس، ساڵی ١٩٨٢ په‌یوه‌ندی به ڕیزه‌كانی پارتی دیموكراتی كوردستان و ساڵی ١٩٨٧ په‌یوه‌ندی به هێزی پێشمه‌رگەی کوردستانەوە كردووه، ئەندامی کۆنگرەکانی یازده‌یه‌‌م ١٩٩٣ و دوازدەیەم ١٩٩٩ بووە و لە کۆنگرەی سێزده‌یه‌‌م ٢٠١٠دا به ئه‌ندامی یه‌ده‌گی ئه‌نجومه‌نی سه‌ركردایه‌تی پارتی دیموكراتی كوردستان هه‌ڵبژێردراوه.
ژیاننامە
بڵند ئیسماعیل ساڵی ١٩٦٥ لە هەولێر له‌دایكبووە، ده‌رچووی خانه‌ی مامۆستایانی هه‌ولێره، ساڵی ٢٠٠٦ به‌كالۆریۆسی یاسای لە به‌شی یاسای ئێوارانی زانكۆی سه‌ڵاحه‌دین-هه‌ولێر وه‌رگرتووه. شاره‌زای زمانه‌كانی كوردی، عه‌ره‌بی و فارسییه.
خەباتنامە
بڵند ئیسماعیل ساڵی ١٩٨٢ په‌یوه‌ندی به ڕیزه‌كانی پارتی دیموكراتی كوردستان و ساڵی ١٩٨٧ په‌یوه‌ندی به هێزی پێشمه‌رگه‌ی کوردستانەوە كردووه و بەشداری لە چەندین شەڕ و ڕووبەڕووبوونەوە لە دژی حکومەتی بەعسدا کردووە.
ساڵانی (١٩٨٨-١٩٩١) و له دوای پرۆسه‌ی ئه‌نفاله‌كان ئاواره‌ی وڵاتی ئێران بووه، ساڵی ١٩٩١ به‌شداری له ڕاپه‌ڕینی باشووری كوردستاندا كردووه و به‌رپرسی به‌ره‌ی پیرزین له سنووری پارێزگای هه‌ولێر بووە، لە دوای ڕاپەڕینەوە چەندین ئەرک و بەرپرسیاریەتی حزبیی وەکو بەرپرسی لێژنەی ناوچە و بەرپرسی لیژنەی لقی بەڕێوەبردووە.
ئەندامی کۆنگرەکانی یازده‌یه‌‌م ١٩٩٣ و دوازدەیەم ١٩٩٩ بووە و لە كۆنگره‌ی سێزده‌یه‌‌م ٢٠١٠دا به ئه‌ندامی یه‌ده‌گی ئه‌نجومه‌نی سه‌ركردایه‌تی پارتی دیموكراتی كوردستان هه‌ڵبژێردراوه.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
