ژیاننامە
ئەڵاکەرەم محەمەد عەزیز عەزیز لە ساڵی ١٩٤٧ لە ناحیەی خورماڵی سەر بە پارێزگای هەڵەبجە لە دایکبووە، دانیشتووی خورماڵ بوو و سەرقاڵی کاری جوتیاری و کاسبی بازاڕی خورماڵ بووە، ئەڵاکەرەم محەمەد خێزاندار بووە و خێزانی ناوی خاوەر محەمەد بووە و خاوەنی یەک کچ بووە بە ناوی دڵگیر، لە ساڵی ١٩٦٩ شەهید بووە.
خەباتنامە
شەهید ئەڵاکەرەم محەمەد عەزیز لە ساڵی ١٩٦٤ پەیوەندی کردووە بە ڕێکخستنەکانی ڕێکخراوی خورماڵی سەر بە لیژنە ناوچەی هەڵەبجەی لقی چواری پارتی دیموکراتی کوردستان، کە لەوکاتدا سەعیدی قالەی خەیات بەرپرسی ڕێکخراو بووە.
لە ساڵی ١٩٦٦ ئەڵاکەرەم محەمەد لە ڕێگەی ڕێکخراوی خورماڵەوە نێردراوە بۆ شاخ و لە (قوەی دەرەک) لەلای شەهید مەنوچەر بەگی ئێناخی بۆتە پێشمەرگە، قوەی دەرەک چەند هێزێکی خۆرسکی کۆمەڵایەتی بوون کە لە ژێر ناوی (قوەی دەرەک) سەر بە هێزی خەباتی پارتی دیموکراتی کوردستان بوون، ئەو هێزانەش بریتی بوون لە هێزی حسێن بەگی وەکیڵی جوانرۆ، هێزی مەنوچەر بەگی ئێناخی، هێزی قایەر بەگ و هێزی عوسمانی عەلی چەتوون.
لە ساڵی ١٩٦٩ جەلالیەکان (کۆڵوانە سور) بە هاوکاری هێزێکی زۆری سەربازی ڕژێمی ئەوکاتی عێراق، هێرشێکی فراوانیان کردبووە سەر سەنگەرەکانی پێشمەرگە لە دەڤەری دەشتی شارەزوور، هەڵەبجە و هەورامان. ئەڵاکەرەم محەمەد و هاوسەنگەرانی لە سەنگەری عەبابەیلێ ڕووبەڕووی کۆڵوانە سورەکان بوونەتەوە و لە ئەنجامدا ئەڵاکەرەم محەمەد و هاوسەنگەرێکی بە ناوی کەمال عەلی نادر بە سەختی بریندار بوونە، بە برینداری کەوتوونەتە دەست یەکێک لە کۆڵوانە سورەکان بە ناوی محەمەد کوێخا کەریم و بە برینداری بە دوای دەبابەوە ڕایان کێشاون تا ناو سەنتەری شاری هەڵەبجە، دواتر لەبەر چاوی خەڵکی ناو بازاڕی هەڵەبجە فیشەکبارانیان کردوون، دوای شەهیدکردنیان چەند سوکایەتیەکی بە جەستەشیان کردووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
