ئیبراهیم محەمەد عەزیز، ناسراو بە ئیبراهیم ڕەشاوەی (ڕەشاڤەیی)، ساڵی ١٩٢٨ لە گوندی ڕەشاوەی لە ناوچەی نەهێلی سەربەقەزای ئامێدی پارێزگاى دهۆک لەدایک بووە، ساڵی ١٩٥٩ پەیوەندی بەڕیزەکانی پارتی دەکات و ساڵی ١٩٦١ لەگەڵ هەڵگیرسانی شۆڕشی ئەیلوول بەچەکی خۆی چۆتە ناو ڕیزەکانی پێشمەرگە لە ناوچەی بەرواری باڵا و لەگەڵ پێشمەرگەکانی مەلا شنی لەشەڕەکانی دەڤەری ئامێدی بەشداری کردووە، دواتر بۆتە پێشمەرگە لەلای حارس خانۆ بێدارونی و لەشەڕەکانی خیزالا، گۆڕا باهیڤێ، سەری بێدارون، پردی چامێ بەشداربووە، ساڵی ١٩٦٢ لەگەڵ جەنەراڵ مستەفا بارزانی پەڕیوەتەوە بۆ ناوچەی سۆران، سەرەتا لە دۆڵەڕەقە و دواتر لەسەنگەسەر لەگەڵ حسۆ میرخان ژاژوکى بووە، ساڵی ١٩٦٤ گواستراوەتەوە بۆ ناوچەی گەڵاڵە و ساڵی ١٩٦٥ لەقەسرێ بووە، بەهۆی هەڵگرتن و گواستنەوەی سندوقی فیشەک و گوللە تۆپ تووشی ئازاری پشت بووە و گواستراوەتەوە بۆ ورمێ و لەوێ نەشتەرگەری بۆ کراوە.
ساڵی ١٩٧٥ دوای نسکۆی شۆڕش، ناوبراو لە پشوودان بووە و چەکەکەی داوەتە ڕژێمی عێراق، بەڵام خۆی بەقاچاخ ڕۆشتووە بۆ دەڤەری دۆسکی و لەوێوە بە باکووری کوردستاندا خۆی گەیاندۆتە ئوردۆگای زێوە و شاری نەغەدە و لەوێ کراوە بە پاسەوانی بارەگای بارزانی، دوای ڕۆشتنی بارزانی بۆ کەرەج، ناوبراو گواستراوەتەوە بۆ ئوردۆگای جەهرم و لەوێوە ڕەوانەی شاری ئابادان کراوە، دواتر بە قاچاخ خۆی گەیاندۆتەوە شاری کەرەج و چاوی بە ئیدریس بارزانی کەوتووە، لە ڕۆژی ١٦ی ئەیلوولی ١٩٧٦ لەلایەن ئیدریس بارزانىەوە ڕەوانەی باشووری کوردستان کراوەتەوە.
ساڵی ١٩٨٠ لەگەڵ هێزی پێشمەرگەى سەربە مستەفا نێروەیی بووە، ساڵى ١٩٨٠ دوای هەڵگیرسانی شەڕی نێوان عێراق و ئێران، دۆڵی ئیسمانکاوە لە دەڤەرى بادینان بەرەبەرە ئازاد بووە، بۆیە ئیبراهیم ڕەشاڤەیی چووەتە گوندی ئەلە لەدەڤەری نێروە و لەوێ گوندێکی نزیک ٤٠ ماڵە لە بنەماڵەی پێشمەرگەکان پێک دەهێنن، ساڵى ١٩٨٨دوای شاڵاوە بەدناوەکەی ئەنفال و کیمیابارانکردنی ناوچەی بادینان، لەگەڵ هەموو خێزانەکانی ئەو گوندە خۆی گەیاندۆتە باکووری کوردستان و لە ڕۆژی ١٠ی تشرینی یەکەمی ١٩٨٩ گەڕاوەتەوە بۆ ڕۆژهەڵاتی کوردستان، ساڵی ١٩٩٢ دواى ڕاپەڕینى جەماوەرى باشوورى کوردستان گەڕاوەتەوە بۆ باشووری کوردستان.
ئیبراهیم ڕەشاڤەیی بەشداری ٣٩ شەڕی کردووە و لەشەڕەکانی سەری ئامێدی لەساڵی ١٩٦١، شەڕەکانی دەڤەری چۆمان لەساڵی ١٩٧٤و شەڕی گەلی ڕەشاوە لە دەڤەری ئامێدی لەساڵی ١٩٧٨ برینداربووە، ساڵی ٢٠١٠ لە کۆنگرەی سێزدەیەمی پارتی دیموكراتی كوردستان لەلایەن سەرۆک مەسعود بارزانی مەدالیای بارزانی پێ بەخشرا.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
