ئامینە محەمەد هاوشانی هاوسەرەکەی لە شێروان مەزن خزمەتی پێشمەرگەی کردووە و نان و خواردنی بۆیان دروست کردووە، تەنانەت لە شەڕەکانیشدا لە خزمەتکردنی پێشمەرگە دوور نەکەوتووەتەوە. لە ڕۆژى ٤ى ئایارى ١٩٦٦ ناجی بەگی هاوسەری لە شەڕی چیای زۆزک لە ناحیەى دیانا شەهید بووە.
ئامینە دوای شەهیدبوونی هاوسەرەکەشى لە هاوکاریکردنى هێزى پێشمەرگە بەردەوام بووە. ساڵى ١٩٧٥ دواى نسکۆى شۆڕشی ئەیلوول ئاوارەى وڵاتى ئێران بووە، سەرەتا لە کۆمەڵگای زێوە نیشتەجێ بووە و دواتر گواستراوەتەوە بۆ کۆمەڵگای (ئوردوگای پەنابەران)ی جەهروم لە پارێزگای فارس و دواتر لە تەورێز نیشتەجێ کراوە. ساڵى ١٩٧٩دوای ڕووخانی ڕژێمی پاشایەتى و دامەزراندنى کۆمارى ئیسلامى لە ئێران، ئامینە گەڕاوەتەوە بۆ کۆمەڵگای زێوە و لەو کۆمەڵگایە نیشتەجێ بووە. دوو لە کوڕەکانی بە ناوەکانی مامەند و ڕەشید ناردووەتە ڕێزی هێزى پێشمەرگە کە بەرگری لە گەل و نیشتمان بکەن و بۆ درێژەدان بە خەبات لەگەڵ حاجی بێرۆخى گەڕاونەتەوە باشووری کوردستان. ئامینە لەگەڵ سێ لە منداڵەکانی و نەوە و بووکەکانی لە کۆمەڵگای زێوە ماوەتەوە. ڕۆژى ٩ی حوزەیرانى ١٩٨٥ لە بۆردومانى کۆمەڵگاى زێوە لەلایەن فڕۆکەکانى ڕژێمى عێراقەوە، شەش نەوە و هاوسەرى ڕەشیدى کوڕى شەهید و هاوسەرى مامەندى کوڕى و دوو نەوەی دیکەشی برینداربوون. ساڵى ١٩٨٨ مامەندى کوڕی لە داستانى خواکوڕک شەهید بووە.
ساڵی ١٩٩٣ گەڕاوەتەوە باشوورى کوردستان و سەرەتا لە شارى پیرمام و دواتر لە شارى سۆران نیشتەجێ بووە. لە ١٦ى ئابى ١٩٩٦ و لە یۆبیلى زێڕینى پارتى دیموکراتى کوردستاندا، میدالیاى بارزانى نەمرى وەرگرتووە.
سەرچاوە:
١.ئەرشیفی دەستەی ئینسکلۆپیدیای پارتی دیموکراتی کوردستان.
