لوقمان فەتاح ناسراو بە هێرش، لە ساڵی ١٩٦٩ لە گوندی شۆڕناخی سەربە ناحیەی سورداشی قەزای دووکان پارێزگاى سلێمانى لە دایکبووە، قۆناغی سەرەتایی تەواو کردووە، گوندنشین و سەرقاڵی کاری جووتیاری بووە، ساڵی ١٩٨٧ ئاوارەی وڵاتی ئێران بووە و لە شاری بانە نیشتەجێ بووە.
لوقمان فەتاح، ساڵی ١٩٨٧ پەیوەندی بە هێزى پێشمەرگەى شۆڕشی گوڵان کردووە و لە لێژنەی ناوچەی شوانی سەربە لقی سێی پارتی دیموکراتی کوردستان بۆتە پێشمەرگە. بەشداری داستانی خواکوڕک، شەڕی دەربەند باسەران، شەڕی باخی عەبدول شێخ کەریم و شەڕی قەرەداغ کردووە، ساڵى ١٩٨٨ دوای تاوانى ئەنفالی ڕژێمى بەعس دژى خەڵکى کوردستان بەشداری چالاکییە پارتیزانیەکانی دەڤەری دووکان و سورداش و کۆیە و قەرەداغی کردووە.
ساڵی ١٩٩١ بەشداری ڕاپەڕینە جەماوەرییەکەی خەڵکی کوردستان و ئازادکردنی شاری سلێمانی، قەزای دووکان و ناحیەی بازیان کردووە و لە ئازادکردنی ناحیەی بازیان و لە گرتنەوەی بنکەی پۆلیسی بازیان، لوقمان فەتاح گولەى بەرکەوتووە و شەهید بووە و هاوسەنگەرانی لە گوندی کوپەلەی بازیان بە خاکیان سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
