فەرهاد ڕەسوڵ، ساڵی ١٩٤٦ لە گوندی تەتەراوەی سەربە قەزاى قوشتەپەی پارێزگاى هەولێر لە دایکبووە، گوندنشین و سەرقاڵی کاری جووتیاری بووە، بۆ خوێندنی قۆناغی سەرەتایی ڕووی کردۆتە گوندی دۆڵە دزەی هاوسنووری گوندەکەیان و هەرلەوێ ئەو قۆناغەی تەواو کردووە، خێزاندار بووە و خاوەنی یەک کوڕ بووە.
فەرهاد ڕەسوڵ لە ساڵی ١٩٦٨ پەیوەندی بە هێزى پێشمەرگەى شۆڕشی ئەیلوول کردووە و لە بەتالیۆنی ئەحمەدی حاجی عەلی سەربە هێزی دەشتی هەولێری پارتی دیموکراتی کوردستان بۆتە پێشمەرگە. ساڵی ١٩٦٩بەشداری شەڕی سێ قوچان و شەڕی چیای سەفین و ساڵی ١٩٧٤بەنی هەریر و شەڕی چیای کۆڕەک و شەڕی وەرتێی کردووە.
فەرهاد ڕەسوڵ، دووجار بریندار بووە، ساڵی ١٩٦٩ لە شەڕی سێ قوچانی نزێک دەڤەری شێراوەی سەربە پارێزگای هەولێر، کە ڕووبەڕوبوونەوە بووە لەگەڵ جاشەکانی دژ بە شۆڕشی گەلی کورد،
ساڵی ١٩٧٤ لە شەڕی زینی وەرتێ کە بەرگریکردن بووە لە هێرشی سەربازی عێراق بۆسەر سەنگەری هێزی پێشمەرگە. دواى برینداربوونى لە بارەگا لە بناری چیای وەرتێ ماوەتەوە بۆ وەرگرتنی چارەسەری برینەکەی، بەڵام لە لایەن فڕۆکەی ڕژێمی ئەوکاتی عێراقەوە بەچڕی بۆردوومانی بارەگا و سەنگەرەکانی هێزی پێشمەرگەی کراوە و فەرهاد ڕەسوڵ بەر بۆردوومانەکە کەوتووە و شەهید بووە، دواتر هاوسەنگەرانی هەر لە چیای وەرتێ بەخاکیان سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
