عەلی مستەفا عوسمان، ساڵی ١٩٥١ لە گوندی شەدەڵانی سەربە ناحیەی سورداشی قەزای دووکان پارێزگاى سلێمانى لە دایکبووە، گوندنشین و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە، خێزاندر بووە و خاوەنی چوار کوڕ و سێ کچ بووە، ساڵى ١٩٧٥ دوای نسکۆی شۆڕشی ئەیلوول ئاوارەی وڵاتی ئێران بووە و لە شاری خانێ نیشتەجێ بووە. ساڵى ١٩٧٦ گەڕاوەتەوە شارى سلێمانى.
ساڵی ١٩٦٩ پەیوەندى بە هێزى پێشمەرگەی شۆڕشی ئەیلوول کردووە و لە لقی دوو بەفەرماندەیی شێخ عەبدولخالق شەدەڵەیی، سەربە بەتالیۆنی سێی سورداش بەفەرماندەیی فاتیح حەمەڕەش، لە هێزی ڕزگاری پارتی دیموکراتی کوردستان بۆتە پێشمەرگە، بەشداری شەڕی چیای قەرەداغ، شەڕی چیای بەمۆ، شەڕی چیای سورداش، شەڕی بازیان، شەڕی چیای گوڵان، شەڕی چیای زۆزک و شەڕی حاجی ئۆمەران کردووە.
ساڵی ١٩٩١ لە ڕاپەرینە جەماوەرییەکەی خەڵکی کوردستان، پەیوەندى بەهێزى پێشمەرگەى پارتى دیموکراتى کوردستان کردووە و چەکی هەڵگرتووە و بۆتەوە پێشمەرگەی لێژنەی ناوچەی دووکانی سەربە لقی چواری پارتی دیموکراتی کوردستان.
لە ٧ی ئاداری ١٩٩١ هێزەکانی پێشمەرگەی کوردستان هێرشیان بردووەتە سەر باڵەخانەی ئەمنە سورەکەی سلێمانی، لە لایەن هێزى ئەمنی عێراق ڕووبەڕووی هێزی پێشمەرگە بوونەتەوە و لە ئەنجامدا عەلى مستەفا شەهید بووە. دوای گیرانى بارەگای ئەمنە سورەکە و ئازادکردنی شاری سلێمانی، هاوسەنگەرانی تەرمی شەهید عەلى مستەفایان لە گۆرستانی ئابڵاخی شاری سلێمانی بە خاک سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
