ژیاننامە
عەلی تەحسین محەمەدئەمین مەحمود ناسراوە بە عەلی مەلا، ساڵی ١٩٥٢ لە گوندی دەرەی مەڕی سەر بە ناحیەی بیارە لە دایکبووە، دانیشتووی ناحیەی خورماڵ بووە و سەرقاڵی کەسابەتی ناو بازار بووە، عەلی تەحسین خاوەنی دوو خێزان بووە بەناوەکانی حەسیبە و شنە و خاوەنی دوو کوڕ و پێنج کچ بووە بەناوەکانی مادیح، عومەر، بەدیعە، ڕەنگین، مەهاباد، شادان و تابان، ساڵی ١٩٨٧ شەهید بووە.
خەباتنامە
عەلی تەحسین ناسراو بەعەلی مەلا فەرماندەی سریە بووە لە هێزێکی چەکداری سەر بە ڕژێمی بەعس، ساڵی ١٩٨٤ لەگەڵ شەش چەکداری هاوڕێی بەناوەکانی نەجمەدین جەبار، مامۆستا فاتیح، ئەرسەلان، شوان و ١٨ چەکی جۆری کڵاشینکۆڤ و ١٨ تاقمی چوار مەغزەنییان بردووە و چونەتە وڵاتی ئێران و لە دەربەندی دزڵی چاویان بە نادر هەورامی فەرماندەی هێزی هەورامان کەوتووە و بوونەتە پێشمەرگەی هێزی هەورامانی پارتی دیموکراتی کوردستان. عەلی مەلا پلەی سەرپەلی وەرگرتووە و بۆتە ئامر مەفرەزەی پارتیزانی، لە هەمانکاتدا لەناو خورماڵ دایک و برایەکی دەستگیر کراون تا پارەی تەواوی ١٨ چەکەکەیان داوە.
عەلی مەلا بەشداری لێدانی کارەبای خورماڵ، لێدانی قەڵای خورماڵ، شەڕی چیای سورێن، شەڕی دەشتی شارەزوور، شەڕی گوندی بانی شار، شەڕی سەربازگەکانی ملەقۆنەرە و دۆڵاو، شەڕی ئەحمەد ئاوا کردووە.
لە ٥ی ئابی ١٩٨٧ لە دامێنی چیای سورێن و لە شەڕی ئەحمەد ئاوا، عەلی مەلا لە گرتنەوەی سەنگەری هانەی قوڵی پشت ئەحمەد ئاوا فیشەکی بەرکەوتووە و شەهید بووە، هاوکات لەگەڵ ئەودا لەو شەڕە لە سەنگەری ملەقۆنەرە هەر لە پشت ئەحمەدئاوا، سەرداری حاجی حسێن دەرەقەیسەری و شەهید شێخ سەلام و چەند هاوسەنگەرێکی تری شەهید بوون.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
