عەزیز توفیق عەبدولقادر، ساڵی ١٩٤٦ لە گوندی بەڕوێنی سەربە ناحیەی بەمۆی پارێزگای هەڵەبجە لە دایکبووە، گوندنشین بووە و سەرقاڵی کاری جوتیاری بووە، تا قۆناغی سەرەتایی خوێندووە. خێزاندار بووە و خێزانی ناوی عەتیە فەتاح بووە و خاوەنی شەش کوڕ بووە بەناوەکانی ئەرکان، ئەرسەلان، سامان، سەرکەوت، سەروەت، سەرتیپ.
ساڵی ١٩٦٢ لە پەلی تەوێڵەی سەربە بەتالیۆنی خەباتی پارتی دیموکراتی کوردستان، کە لەوکاتەدا قادر حەمەساڵح تاگۆزی سەرپەلی بووە بۆته پێشمه‌رگه. له چه‌ندین شه‌ڕ بەژداری کردووە لەوانه شه‌ڕی سەرتیز، شەڕی بەمۆ، شەڕی زمناکۆ، شەڕی گەڵاڵە، شەڕی حاجی ئۆمەران، شەڕی گەرمیان، شەڕی هەندرێن، شەڕی دەربەندیخان، شەڕی هەڵەبجە.
ساڵی ١٩٦٨ پلەی سەرپەلی لە لقی چواری بەتالیۆنی شەشی بەمۆی هێزی خەبات وەرگرتووە، ساڵی ١٩٧٢ بۆتە بەرپرسی بەشی سەربازی بەتالیۆنی شەشی بەمۆی هێزی خەبات. دوای نسکۆی شۆڕشی ئەیلوول چەکی دانەناوە و هاوشانی هاوسەنگەرانی لە لقی تاگۆزی درێژەی بە خەباتی پێشمەرگایەتی خۆی داووە. ساڵی ١٩٧٨ پلەی سەرلقی لە بەتالیۆنی تاگۆزی وەرگرتووە، کە لەوکاتەدا قادر حەمەساڵح تاگۆزی فەرماندەی بەتالیۆن بووە، ساڵی ١٩٨٢ بۆتە فەرماندەی بەتالیۆن کە سەربە هێزی سیروانی پارتی دیموکراتی کوردستان بووە و جەلال لاورانی فەرماندەی هێزەکە بووە.
لە ١٠ی ئه‌یلوولی ١٩٨٢ عەزیز توفیق عەبدولقادر و مەفرەزەیەک له هاوسەنگەرانی دوای گەڕانەوەیان لە چالاکییەکی پارتیزانی ناوشاری هەڵەبجە، لە گوندی گورگەچیای دەڤەری تاگۆزی سەربە پاریزگای هەڵەبجە، هێزێکی زۆری به‌كرێگیراوی جاش و سوپای ڕژێمی بەعس چواردەوری گوندەکەیان گرتووە، پێشمه‌رگه‌كان ڕووبەڕووی هێزی سوپا بوونه‌ته‌وه، دوای رووبەڕوو بوونەوەیەکی چەند کاتژمێری و بەهۆی کەمی ژمارەی پێشمەرگەکان و زۆری سەرباز و جاشی ڕژێم عەزیز توفیق عەبدولقادر و هاوسەنگەرێکی بەناوی خالید عەزەم تۆفیق کە برازای خۆی بووە بە برینداری لەلایەن سەربازەکانەوە دەستگیر کراون، دواتر بە فەرمانی هەواڵگری گشتی عێراق هەرلە شەوی١٠ی ئه‌یلوولی١٩٨٢ لە دەروازەی گورگەچیا گوله باران کراوون و شەهید بوونە.
سەرچاوە:
- ئینسکلۆپیدیای پارتی دیموکراتی کوردستان.
