شەهید شێخ حەمەدەمین عوسمان، ناسراوە بە (عەریف شێخە)، لە ساڵی ١٩٢٥ لە گوندی ڕۆستێی سەربە ناحیەی گەڵاڵەی قەزای چۆمان پارێزگاى هەولێر لە دایکبووە، گوندنشین و سەرقاڵی کاری جوتیاری بووە، تا قۆناغی ناوەندی لە گوندی ڕوستێ خوێندووە، شارەزاییەکی تەواوی لە زمانەکانی عەرەبی و فارسی هەبووە، خێزاندار بووە و خاوەنی چوار کوڕ و دوو کچ بووە.
عەریف شێخە، ساڵی ١٩٦٣ پەیوەندى بە هێزى پێشمەرگەى شۆڕشى ئەیلوول کردووە و لە بەشی تۆپخانەی هێزی باڵەکی پارتی دیموکراتی کوردستان بۆتە پێشمەرگە، لە ساڵانی ١٩٥٠یەکاندا بەهۆی سەربازی زۆرە ملێیەوە بۆتە سەربازی ڕژێمی ئەوکاتی عێراق و بەشداری چەندین خولی بەکارهێنانی چەکی دوورمەودای کردووە و شارەزاییەکی تەواو تۆکمەی دروست کردووە، هەربۆیە لەگەڵ بوونی بە پێشمەرگە کراوەتە بەکارهێنەری تۆپی (٢٥ ملم ڕەتڵ و ١٢٢ملم مەیدان و ١٥٥ ملم)، هەروەها لە چەندین بابەتی گرنگ و پێویستدا هاوکارێکی زۆر باشی بەشی تۆپخانەی گشتی شۆڕش بووە و لە دوو خولی پێگەیاندنی پێشمەرگەدا بۆ چەکی دوورمەودا وەک مامۆستا بەشداری کردووە و ڕۆڵی باڵای بینیوە کە خولەکان بریتی بوون لە خولی حامیەی ڕواندز و خولی گەڵاڵە.
عەریف شێخە بەشداری کارای هەبووە لە داستانەکانی دەشتی دیانا بەگشتی و شەڕەکانی کۆرەک، سەرتیز، حامیەی ڕواندز، گەلی عەلی بەگ، کۆرەک، بەرسیرین و بێخاڵ. لە ژیانی پێشمەرگایەتیدا دووجار بە سەختی بریندار بووە کە هەردووجارەکەی بە هۆی بۆمبارانی فڕۆکەی ڕژێمی ئەوکاتی عێراق بووە، لە ساڵی ١٩٦٩ لە شەڕی دەشتی دیانا و ساڵی ١٩٧٤ لە گوندی بەرسیرین و لەلایەن سەرکردایەتی شۆڕشەوە بۆ وەرگرتنی چارەسەر ڕەوانەی وڵاتی ئێران کراوە و ماوەی دوو مانگ لە نەخۆشخانەی شاری مەهاباد چارەسەری وەرگرتووە.
ساڵی ١٩٧٧ پەیوەندى بەهێزى پێشمەرگەى شۆڕشی گوڵان کردوەتەوە و و هێزێکى لە گوندەکانى دەڤەرەکە و دەشتی دیانا پێک هێناوە و لە دەڤەری باڵەک دەستى بە جموجوڵی پارتیزانی کردووە، بۆیە کۆمەڵێک لە جاش و خۆفرۆشی دژ بە گەل، پلانی لەناوبردنى عەریف شێخ دادەڕێژن.
لە ٢١ی ئاداری١٩٧٧ بەپیلانىێکى ڕێکخراو لەلایەن نەیارانى پارتى، بۆ چاوپێکەوتنى ئەو پێشمەرگانەى پەیوەندى بەشۆڕش دەکەن، عەریف شێخ دەچێتە قرنە و پشت ئاشان لە بناری چیای قەندیل بە ئاراستەی شارەدێی قەڵادزێ، هەر لەگەڵ گەیشتنی عەریف شێخە لەلایەن نەیارانی پارتیەوە چواردەوری گەمارۆ دراوە و دراوەتە بەر دەستڕێژی گولە و عەریف شێخە شەهید کراوە.
سەرچاوە:
١-ئەرشیفى دەستەى ئینسکلۆپیدیای پارتى دیموکراتى کوردستان.
