عەبدولواحید حەمەد لاو، ناسراو بە عەبدولواحید حەمەد لاو، ساڵى ١٩٤٦ لە گوندى گوانى سەر بە ناحیەى دیاناى پارێزگاى هەولێر لەدایک بووە، خێزاندار بووە و خاوەنى دوو کوڕ و چوار کچ بووە.
ساڵى ١٩٦٤ پەیوەندى بە ڕیزى پارتى دیموکراتى کوردستان کردووە، پلەکانى حزبى بڕیوە، دواجار بۆتە ئەندامى لێژنە ناوچەى ڕواندز، هەمان ساڵ پەیوەندى بە هێزى پێشمەرگەى کوردستان دەکات، لە بەتالیۆنى سەید عاسى سەر بە هێزى باڵەک دەبێتە پێشمەرگە، هەر زوو دەبێتە سەر لق لەهەمان بەتالیۆن، دواى ڕێککەوتننامەی ١١ی ئازاری ١٩٧٠ لە نێوان پارتی دیموکراتی کوردستان بە سەرۆکایەتی مەلا مستەفا بارزانی و حزبی بەعس واژۆ کرا، عەبدولواحید حەمەد لاو بەردەوام دەبێت لە کارى ڕێکخستن لە سنوورى لێژنە ناوچەى ڕواندز.
ساڵى ١٩٧٤ دواى دەسپێکردنەوەى شەڕ لە نێوان هێزى پێشمەرگە و حزبى بەعس، عەبدولواحید حەمەد لاو دووبارە چەکى پێشمەرگایەتى هەڵدەگرێت و بەرگرى لە خاکى کوردستان دەکات، لە ١٧ى نیسانى ١٩٧٤ لە شەڕى چیاى گۆرەز لە نزیک گوندى باڵەکیانى ناحیەى دیانا، خۆی و برای و ئامۆزای و چەند کەسێک لە خزمانی شەهید دەکرێن.
لەبەر بارودۆخی شەڕ و بوونی بۆمبارانى تانک و تۆپی دوژمن نەدەتوانرا ڕوفاتی شەهیدان لەگوندی گوان بەخاک بسپێرن، بۆیە لە گوندی سیتکان بەخاک سپێردران.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
