شەهید عەبدولغالب تۆفیق لە ساڵی ١٩٢١ لە گوندی قەفاری سەربە ناحیەی شوانی پارێزگای کەرکووک لە دایکبووە، گوندنشین بووە و سەرقاڵی کاری جوتیاری بووە، ئاستی خوێندەواری سەرەتایی بووە و بێجگە لە زمانی دایک(کوردی) شارەزاییەکی تەواوی لە زمانەکانی عەرەبی، تورکی، فارسی هەبووە، عەبدولغالب تۆفیق خێزاندار بووە و خێزانی ناوی نەعیمە قادر بووە و خاوەنی دوو کوڕ و یەک کچ بووە.
لە ساڵی ١٩٦٣ پەیوەندی بە شۆڕشی ئەیلوولەوە دەکات و دەبێتە پێشمەرگە لە هێزی دەشتی هەولێری پارتی دیموکراتی کوردستان، کە لەوکاتەدا فارس باوە فەرماندەی هێز بووە. بەشداری کارای هەبووە لە داستانەکانی دەڤەری کەرکووک و دەڤەری شوان.
لە دوای بەیاننامەی لێک گەیشتنی ١١ی ئازاری ساڵی ١٩٧٠ عەبدولغالب تۆفیق وەک کادری حیزبی پارتی دیموکراتی کوردستان دڕێژە بە خەباتی خۆی داوە.
لە ساڵی ١٩٧٩ لەلایەن هێزێکی جاشی ڕژێمی بەعسەوە دەستگیر کراوە و گوازراوەتەوە گرتووخانەی ئەبوغرێب، لە دوای دوو ساڵ لە بەرامبەر ٣،٠٠٠ دیناری ئەوکاتی عێراق ئازادکراوە. دوای ئازادبوونی لە ساڵی ١٩٨١ دووبارە پەیوەندی دەکاتەوە بە ڕێکخستنەکانی پارتی دیموکراتی کوردستان و بۆتە کادری (خەتی ئاگرین)ی سەربە لێژنەی ناوچەی شوانی سەربە لقی سێی پارتی دیموکراتی کوردستان، کە لەوکاتەدا سەید عاسی عەلی سەرپەرشتیاری شانە نهێنیەکانی دەڤەرەکە بووە و شەهید سەید حەسەن بەرپرسی لێژنە ناوچە بووە.
عەبدولغالب تۆفیق لە ڕاپەڕینە جەماوەرییەکەی خەڵکی کوردستان لە ساڵی ١٩٩١ بۆتەوە پێشمەرگە و پەیوەندی کردووە بە هێزی ڕێکخراوی خاڵخاڵانی سەربە لێژنە ناوچەی شوانی سەربە لقی سێی پارتی دیموکراتی کوردستان، کە لەوکاتەدا شەهید نەوزاد بەرپرسی ڕێکخراو و فەرماندەی هێزەکە بووە. بەشداری ڕاپەڕینە جەماوەرییەکەی ساڵی ١٩٩١ لە ئازادکردنی پارێزگای هەولێر، ناحیەی دارەتوو، ناحیەی تەکیە، قەزای چەمچەماڵ، پارێزگای کەرکووک کردووە.
دوای کۆڕەوە ملیۆنیەکەی خەڵکی کوردستان لە ساڵی ١٩٩١ عەبدولغالب تۆفیق و دەستەیەک هاوسەنگەری لە ناحیەی کۆڕێ کەوتوونەتە بەر هێرشی تۆپبارانی تۆپخانەکانی ڕژێمی بەعس و عەبدولغالب تۆفیق بە سەختی بریندار بووە، دواتر هاسەنگەرانی دەیگوازنەوە ناحیەی دیانان بۆ وەرگرتنی چارەسەری برینەکەی، بەڵام بەهۆی سەختی برینەکەیەوە عەبدولغالب تۆفیق دوای چوار ڕۆژ لە برینداربوونی لە دیانا شەهید دەبێت و لە گردی ئازادی نزیک حاجی ئۆمەران بە خاکیان سپاردووە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
