ژیاننامە
شەهید عوسمان مەولود لە ساڵی ١٩٤٣ لە گوندی بەرحوشتری سەر بە ناحیەی بەحرکە لە دایکبووە، گوندنشین بووە و سەرقاڵی کاری جوتیاری بووە، لەگەڵ ئەوەشدا لە بنکەی پۆلیسی پارێزگای هەولێر پۆلیس بووە، ئاستی خوێندەواری سەرەتایی بووە. عوسمان مەولود خێزاندار بووە و خێزانی ناوی خەجیجە خزرە و خاوەنی چوار کوڕ و یەک کچ بووە بە ناوەکانی خەلیل، جەمیل، عادل، فازڵ و نەجیبە.
خەباتنامە
شەهید عوسمان مەولود لە ساڵی ١٩٦١ پەیوەندی کردووە بە شانەی نهێنی عەریف عوسمان و عەریف عەلی، لە ساڵی ١٩٦٢ چەکی هەڵگرتووە و بۆتە پێشمەرگە لە لقی عەریف عەلی مەولود، کە سەر بە بەتالیۆنی سەفینی پارتی دیموکراتی کوردستان بووە، لە ساڵی ١٩٧٤ لە دەربەندی ڕایەتی لە وەرتێ لە ڕووبەڕووبوونەوەی سەربازانی ڕژێمی ئەوکاتی عێراق بریندار بووە.
لە دوای نسکۆی شۆڕشی ئەیلوول شەهید عوسمان مەولود ئاوارەی وڵاتی ئێران بووە و دوای ماوەیەکی کەم گەڕاوەتەوە خاکی کوردستان، لە ساڵی ١٩٧٦ لەلایەن ڕژێمی ئەوکاتی عێراقەوە دوورخراوەتەوە بۆ قەزای مسەیب لە پارێزگای بابل، دوای مانەوەی یەک مانگ لەو قەزایە گوێبیستی چەند وشەیەکی ناشرین بووە سەبارەت بە کورد و سەرکردایەتی شۆڕشی کوردی لە چەند پۆلیسێکی ئەو قەزایە بۆیە بڕیاری داوە کە ڕووبەڕوویان ببێتەوە، لە ئەنجامی ڕووبەڕووبوونەوەکە و دوای کوشتنی سێ پۆلیس عوسمان مەولود لەلایەن پۆلیسەکانی ترەوە شەهید کراوە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
